Andijon viloyatida yerdan foydalanish va uni muhofaza qilish, ayniqsa, qishloq xo‘jaligi yerlaridan oqilona va samarali foydalanishni targ‘ib etishga qaratilgan keng ko‘lamli targ‘ibot ishlari olib borilmoqda.

Shunga qaramasdan viloyatda yerdan noqonuniy foydalanish holatlari aniqlanmoqda. 

Kadastr agentligining Andijon viloyati boshqarmasi tizimida joriy yilning o‘tgan davrida yer nazorati tadbirlari davomida 679 ta holatda 53 gektar yer maydoni o‘zboshimchalik bilan egallab olinganligi ma’lum bo‘ldi.

Tahlillarga ko‘ra, o‘zboshimchalik bilan egallab olingan 53 gektar yer maydonining 43,5 gektari qishloq xo‘jaligiga mo‘ljallangan yerlarga, 5,8 gektari aholi punkti yerlariga, 0,5 gektari sanoat, transport, aloqa xo‘jaligi yerlariga, 0,4 gektari o‘rmon xo‘jaligi,  0,4 gektari suv fondi yerlariga, 2,3 gektari esa zaxira yerlarga to‘g‘ri kelgan.

Hududiy kadastr inspektorlari tomonidan qonunbuzilish holatlari yuzasidan tegishli tartibda tushuntirishlar olib borildi. O‘zboshimchalik bilan egallab olingan yerlar bo‘yicha belgilangan tartibda bayonnomalar rasmiylashtirilib, ularni bartaraf etish bo‘yicha zarur choralar ko‘rildi.

Umuman, Andijon viloyatida 2022 yilda yer munosabatlariga oid 4 milliard so‘mdan ziyod miqdordagi ma’muriy jarimalar qo‘llanilgan.

Kadastr agentligi viloyat boshqarmasi yer va kadastr nazorati inspektorlari tomonidan joriy yilning o‘tgan davri mobaynida O‘zbekiston Respublikasi Ma’muriy javobgarlik to‘g‘risidagi kodeksining tegishli moddalari bilan 3 ming 35 ta holatda ma’muriy bayonnomalar rasmiylashtirilib, ularning 2 ming 8 tasi bo‘yicha 4 milliard 978 million  400 ming so‘m miqdorida ma’muriy jarimalar qo‘llanildi.