Bu haqda AOKAda Kadastr agentligi boshqarma boshlig‘i Zilola Abdug‘afurova ishtirokida o‘tkazilgan brifingda ma’lum qilindi:
Jahon banki ishtirokida “Ko‘chmas mulkni ro‘yxatga olish va kadastr tizimlarini modernizatsiyalash” investitsiya loyihasi O‘zbekiston Respublikasi Prezidentining 2571–sonli qaroriga muvofiq amalga oshirilayotgan bo‘lib, Loyihaning asosiy maqsadi: Ko‘chmas mulk va kadastrni ro‘yxatdan o‘tkazishning mavjud “qog‘oz” tizimidan zamonaviy “Ko‘chmas mulk va kadastrni ro‘yxatdan o‘tkazish integratsiyalashtirilgan axborot tizimi”ga o‘tish orqali modernizatsiya qilish;
Shuningdek, “Elektron xukumat" tizimining bazaviy maydonchasida ko‘chmas mulk obyektlari bo‘yicha ma’lumotlar bazasini yaratish hisoblanadi.
Loyihaning umumiy qiymati: 35 million 770 ming AQSh dollarini tashkil qilib,
Moliyalashtirish manbalari:
- Jahon banki krediti hamda O‘zbekiston Respublikasi hissasiga to‘g‘ri keladi.
Loyiha boshidan buyon umumiy qiymati 16 million 50 ming dollarlik 20 ta shartnoma imzolangan bo‘lib, shulardan 11 ta shartnoma bajarilgan, 9 ta shartnoma amalga oshirilmoqda.
Amalga oshirilgan ishlar xususida:
Kadastr va ko‘chmas mulkni ro‘yxatdan o‘tkazishning integratsiyalashtirilgan axborot tizimini (Axborot tizimi) yaratish maqsadida Koreya Respublikasining “LG-LX” konsorsiumi bilan shartnoma tuzilgan bo‘lib, Integratsiyalashtirilgan ko‘chmas mulkni ro‘yxatdan o‘tkazish va UzKAD kadastr axborot tizimi ishlab chiqildi va hozirda uni ishga tushirish ishlari olib borilmoqda;
Shuningdek, ushbu shartnoma bo‘yicha:
80 ta protsessor, 1536 gigabayt operativ xotiraga ega boshqaruv serveri hamda 762 terrabayt hajmdagi dasturiy ta’minot serverlari, 1.1 petabayt hajmdagi ma’lumotlarini saqlash uskunasi, 6 ta server kabinet-shkafdan iborat Respublika ma’lumotlarni qayta ishlash markazi (Datasentr) ishga tushirildi.
Kadastr agentligining 14 ta viloyat kadastr boshqarmalari 973 dona kompyuter jihozlari bilan,
206 ta Kadastr agentligining tuman va shahar filiallari 4532 dona kompyuter jihozlari bilan ta’minlandi
- Rezerv ma’lumotlarni qayta ishlash markazi (Rezerv datasentr) UZINFOKOM davlat axborot tizimlarini yaratish va qo‘llab-quvvatlash uchun yagona integratorning maxsus xonalarida o‘rnatildi;
Loyiha komponentlaridagi shartnomalardan kelib chiqib, 1 700 nafar soha mutaxassislari va foydananuvchilarni o‘qitish ishlari olib borildi.
2. 20 sm aniqlikda aeros’yomka qilish maqsadida Respublikaning 124 816 kv. km. tashkil qiluvchi 11 ta viloyat hududlardagi sug‘oriladigan yerlarda aeros’yomka ishlari bajarildi. Shulardan 58 039 kv. km. maydonning bajarilgan aeros’yomka ishlaridan ortofotoplanlar yaratildi.
Bundan tashqari, loyiha doirasida yer munosabatlarini tartibga solish, tahlil qilish va tavsiyalar ishlab chiqish bo‘yicha Gruziyaning “GLCC Solutions LLC” va Germaniyaning “GCI — Dr. Schindler Geo Consultant International GMBH & CO. KG” kompaniyalaridan tashkil topgan xalqaro maslahatchi Konsorsium, ko‘chmas mulkni ommaviy baholash yo‘nalishida Estoniyadan xalqaro individual maslahatchi jalb qilingan.
