Xalqaro hamkorlik
Bugungi kunda Agentlikning xalqaro aloqalari faol bosqichga olib chiqishga erishildi. Koreya Respublikasi, Turkiya Respublikasi, Rossiya Federatsiyasi, Belorussiya Respublikasi, Gruziya, Xitoy Xalq Respublikasi, Yevropa Ittifoqi, jumladan, Shveysariya, Buyuk Britaniya kabi bir necha davlatlar bilan mustahkam aloqalar o‘rnatildi.
O‘tgan yillarda yer maʼmuriyatchiligi, geodeziya, kartografiya, kadastr va fazoviy ma’lumotlarni boshqarish yo‘nalishlarida o‘zaro hamkorlik aloqalarini rivojlantirish va yanada faollashtirishga qaratilgan Xalqaro Memorandum va Bitimlar imzolandi. Koreya-Yer va fazoviy maʼlumotlarni axborotlashtirish korporatsiyasi bilan (2017), Qozog‘iston-Qazaqstan G‘arish Sapari, Belorussiya Davlat mulk qo‘mitasi, Tojikiston Yer boshqaruvi va geodeziya davlat qo‘mitasi bilan (2018), Rossiya Federatsiyasining Rosreyestr tashkiloti bilan (2021), Turkiya Respublikasining Yerni ro‘yxatga olish va kadastr bosh mudirligi bilan (2024) o‘zaro hamkorlik Bitimlari imzolandi.
Agentlik Turkiy davlatlar tashkiloti doirasida tashkilotga a’zo davlatlarning yer va ko‘chmas mulk munosabatlari, geodeziya, kartografiya va kadastr sohalarida o‘zaro hamkorlik va tajriba almashishga mo‘ljallangan ishchi guruhlar, MDH davlatlarining Geodeziya, kartografiya, kadastr va Yerni masofadan turib zondlash bo‘yicha davlatlararo kengashi, BMT Yerni boshqarish ishchi guruhi, Fazoviy ma’lumotlar infratuzilmasi bo‘yicha Yevrosiyo tashabbusi (EuraAsia SDI) ishchi qo‘mitasining doimiy va faol ishtirokchisi hisoblanib, xalqaro maydonda O‘zbekistonning yer ma’muriyatchiligi, ko‘chmas mulk munosabatlari, geodeziya va kartografiya hamda FMMI sohalaridagi taraqqiyotini munosib taqdim qilib kelmoqda.
Grantlarga doir faoliyat:
Bundan tashqari beg‘araz moliyaviy va texnik ko‘mak berishga jalb etish bo‘yicha Koreyaning KOICA va Yaponiyaning JICA kabi donorlik, Jahon banki kabi xalqaro moliyaviy institutlar, maxsus jamg‘armalari, xorijiy tuzilmalar, xalqaro tashkilotlar bilan hamkorlikni rivojlantirish bo‘yicha doimiy ravishda ishlar amalga oshirilib kelinmoqda.
2021-yil Fazoviy maʼlumotlardan foydalanish va standartlashtirish tizimini yaratishning huquqiy asoslari va metodologiyasini ishlab chiqishga doir Koreya Yer, infrastruktura va transport vazirligining “Rivojlanish uchun rasmiy ko‘mak” (ODA) mablag‘lari doirasida 900 ming AQSH dollari miqdoridagi grant amalga oshirildi.
2023-2025-yillar davomida kadastr va fazoviy ma’lumotlarni boshqarish sohasida milliy kadrlarni tayyorlashga ixisoslashgan 3,2 mln AQSH dollari miqdorida Koreya Yer, infrastruktura va transport vazirligi bilan birgalikda “O‘zbekistonda milliy fazoviy ma’lumotlar bo‘yicha integratsiyalashgan o‘quv tizimini (Markaz) yaratish” grant loyihasini amalga oshirib kelmoqda.
Shuningdek, Agentlik Koreyaning Yer, infratuzilma va transport vazirligi, LX korporatsiyasida “Milliy geoaxborot tizimlari”, “Koreyada ko‘chmas mulk boshqaruvi tizimi va axborotlashtirish”, “Fazoviy ma’lumotlarni boshqarishning integratsion tizimi” mavzularida onlayn va oflayn tarzdagi malaka oshirish treninglari amalga oshirilib kelinmoqda.
Investitsiya loyihalari:
O‘zbekiston Respublikasi Prezidentining 2016 yil 3 avgustdagi PQ-2571 sonli qaroriga muvofiq, umumiy qiymati: 35,77 mln. AQSH dollari bo‘lgan “Jahon banki ishtirokida “Ko‘chmas mulkni ro‘yxatga olish va kadastr tizimlarini modernizatsiyalash” investitsiya loyihasi amalga oshirildi.
Loyiha maqsadi: Ko‘chmas mulk va kadastrni ro‘yxatdan o‘tkazishning mavjud “qog‘oz” tizimini zamonaviy “Ko‘chmas mulk va kadastrni ro‘yxatdan o‘tkazish integratsiyalashtirilgan axborot tizimi”ni yaratish orqali modernizatsiya qilish. Axborot tizimi elektron hukumatning tarkibiy qismi sifatida, geoaxborot va web texnologiyalaridan foydalanilgan holda yaratish hisoblanadi.
