Termiz shahridagi Matbuot uyida Davlat kadastrlari palatasi, Davlat aktivlarini boshqarish agentligi Surxondaryo viloyat hududiy boshqarmalari hamkorligida matbuot anjumani o‘tkazildi.
Anjumanda bugungi kunning eng dolzarb masalalaridan hisoblangan O‘zbekiston Respublikasi Vazirlar Mahkamasining “Qishloq xo‘jaligiga mo‘ljallanmagan yer uchastkalarini xususiylashtirish to‘g‘risida”gi qonunni amalga oshirish chora-tadbirlari haqida qabul qilingan qarori mazmun-mohiyati, uning ijrosi to‘g‘risida ommaviy axborot vositalari vakillariga tushuncha berildi.
Ta’kidlandiki, qarorga ko‘ra O‘zbekiston Respublikasi Davlat aktivlarini boshqarish agentligi yer uchastkasini auksionga chiqarishda buyurtmachi hisoblanib, agentlikning hududiy boshqarmasiga elektron ravishda barcha hujjatlar to‘liq taqdim etilgandan boshlab 15 ish kunida eng yaxshi takliflarni aniqlash orqali baholovchi tashkilotlarni aniqlaydi hamda ular bilan shartnoma tuzish, yer uchastkasining bozor qiymatini aniqlash ishlarini tashkil etilishini ta’minlaydi.
Mazkur qaror bilan tartibga solingan Qishloq xo‘jaligiga mo‘ljallanmagan yer uchastkalarini xususiylashtirish tartibi to‘liq elektron shaklda ekanligi va eng asosiysi o‘tkaziladigan savdolarda rasmiylashtiriladigan hujjatlarda inson omili aralashmasligi bilan savdolarni haqqoniy va shaffof tarzda bo‘lishi belgilab qo‘yilgan.
Matbuot anjumani yakunida jurnalist va blogerlar tomonidan berilgan savollarga mas’ullar atroflicha javob berdi.
