Nurafshon shahrida viloyatda yerdan maqsadli foydalanish ustidan davlat nazoratini amalga oshirish borasida amalga oshirilayotgan ishlar yuzasidan matbuot anjumani o‘tkazildi.
Kadastr agentligi Toshkent viloyati boshqarma boshlig‘i Rustam Payziyev va Davlat kadastrlari palatasi Toshkent viloyati boshqarma boshlig‘i Jasur Ahrorov tizimda amalga oshirilayotgan ishlar haqida atroflicha ma’lumot berdi. Qayd etilganidek, 2022-yilning o‘tgan davrida yer qonun buzilish holatlari bo‘yicha jami 2 ming 204 ta holatda huquqbuzarlarga nisbatan 11 milliard 818 million so‘m ma’muriy jarimalar qo‘llanilgan. Shundan 1 ming 376 holatda 1 milliard 376 million so‘m jarimalar undirilgan. Joylarda aniqlangan 2 ming 769 gektar samarasiz foydalanib kelinayotgan yer maydonlari bo‘yicha tuman-shahar hokimliklariga 76 ta taqdimnomalar kiritilgan. Natijada 55 ta holat bo‘yicha 320 gektar yer maydoni davlat zaxirasiga qaytarildi.
Tahlillarga ko‘ra, o‘tgan yilga nisbatan 2022-yilda yer qonun buzilishi, o‘zboshimchalik bilan qurilish qilish holatlari eng yuqori ko‘rsatkich sifatida Olmaliq shaharida 55 foizga, Ohangaron tumanida 33 foizga va Bo‘stonliq tumanida 30 foizga ko‘paygan. Shu davrda huquqbuzarlik sodir etgan yuridik va jismoniy shaxslarga jarimalar qo‘llash Quyi Chirchiq tumanida 79 foizga, Ohangaron tumanida 77 foizga, Yangiyo‘l tumanida 68 foizga va Bo‘stonliq tumanida 30 foizga ortgan. O‘z navbatida Davlat kadastrlari palatasi Toshkent viloyati boshqarmasiga joriy yil 76 mingdan ziyod aholidan murojaat kelib tushgan bo‘lib, shundan 44 mingdan ortig‘i ijobiy yakunlangan. Soha mutaxassislari tomonidan o‘tkazilayotgan xatlov natijasida kadastr pasporti mavjud bo‘lmagan 3 ta umumta’lim maktab, 10 ta bog‘cha, 8 ta sog‘liqni saqlash ob’ektlarining kadastr pasportlari tayyorlandi. Shu bilan birga, topografiya ishlarini shartnoma asosida amalga oshirib berish uchun yuridik va jismoniy shaxslardan arizalar ham kelib tushgan. Amalga oshirilgan ishlar natijasida 994,02 gektar hudud topografik va kartografik xaritalarga kiritilgan.
Matbuot anjumanida jurnalistlar tomonidan berilgan savollarga mutaxassislar atroflicha javob berdi. Xususan, Kadastr agentligi Toshkent viloyati boshqarma boshlig‘i Rustam Payziyev aholi, ayniqsa, tadbirkorlar orasida yer olish mexanizmini olish tartibi borasidagi tushunmovchiliklar aslida nimadan kelib chiqayotganini aytib o‘tdi. Birgina ijtimoiy tarmoqlarda keng muhokamalarga sabab bo‘lgan Toshkent viloyati Zangiota tumanida 74 ta uyning “snos” ga tushirilgani masalasiga izoh berildi.
