O‘zbekiston Respublikasi Davlat soliq qo‘mitasi huzuridagi Kadastr agentligiga O‘zbekiston Respublikasining “Jismoniy va yuridik shaxslarning murojaatlari to‘g‘risida”gi Qonuniga muvofiq O‘zbekiston Respublikasi hamda xorijiy davlatlarning jismoniy va yuridik shaxslari, shuningdek, fuqaroligi bo‘lmagan shaxslar shaxsan, elektron, og‘zaki va yozma ravishda ariza, taklif, shikoyat bilan murojaat qilish huquqiga ega.
Elektron murojaatlarni - O‘zbekiston Respublikasi Prezidentining virtual qabulxonasi, O‘zbekiston Respublikasi Bosh vazirining Tadbirkorlar murojaatlarini ko‘rib chiqish qabulxonalari orqali;
Og‘zaki va shaxsan murojaatlarni – belgilangan grafiklar asosida qabul kunlarida yoki hududlarda tashkil etiladigan sayyor qabullar orqali;
Yozma murojaatlarni – Pochta xizmati orqali yoki to‘g‘ridan-to‘g‘ri Kadastr agentligi, uning hududiy boshqarma va bo‘limlariga kelib devonxona orqali yuborishingiz mumkin.
Bundan tashqari, Kadastr agentligining “1097” qisqa raqamli “Ishonch telefoni” yoki http://kadastr.uz/uz saytining “murojaat qilish” bo‘limi orqali o‘zingizning ariza, shikoyat, va takliflaringizni qoldirishingiz mumkin.
Murojaatlarni yuborish tartibiga ko‘ra,
- Jismoniy shaxslar - o‘z murojaatlarida jismoniy shaxsning familiyasi (ismi, otasining ismi) yashash manzili, telefon raqami va murojaatning maqsadini;
- Yuridik shaxslar - yuridik shaxsning to‘liq nomlanishi, joylashuv maʼlumotlari (pochta manzili), telefon raqami va murojaatning maqsadini ko‘rsatishlari maqsadga muvofiq.
Yozma murojaat murojaatchi jismoniy shaxs bo‘lganda uning imzosi yuridik shaxs bo‘lganda rahbarning yoki vakolatli shaxsning imzosi bilan tasdiqlangan bo‘lishi lozim.
O‘zbekiston Respublikasining «Jismoniy va yuridik shaxslarning murojaatlari to‘g‘risida»gi Qonuniga muvofiq, yashirin murojaatlar; vakolatlari tasdiqlanmagan tegishli hujjatlari mavjud bo‘lmagan jismoniy yoki yuridik shaxslar orqali taqdim etilgan murojaatlar; qonunchilik bilan belgilangan talablarga javob bermaydigan murojaatlar ko‘rib chiqilmaydigan murojaatlar hisoblanadi.
Kadastr agentligiga shaxsan murojaat qilish maqsadida kelgan fuqarolar Direktor va uning o‘rinbosarlariga belgilangan grafik asosida, qolgan vaqtda masʼul boshqarma va bo‘limlarning boshliqlari yoki sohaviy mutaxassislar tomonidan qabul qilinadi.
