Yer ajratish bilan bog‘liq shaffof va xolisona tizim yaratilgan bo‘lishiga qaramay, bu boradagi qonunbuzilish holatlari hamon uchrab turibdi. Kadastr agentligi Sirdaryo viloyati boshqarmasi boshlig‘i Olimjon MAXAROV bu boradagi ishlar, o‘tgan yildagi qonunbuzilishlari haqida O‘zA muxbiriga quyidagilarni gapirib berdi.
– Kadastr agentligi Sirdaryo viloyati boshqarmasi tomonidan o‘tkazilgan yer va kadastr nazorati tadbirlari natijasida 2022 yil davomida 1 011 ta holatda 264,43 gektar yer maydoni o‘zboshimchalik bilan egallab olingani aniqlandi, – deydi Olimjon Maxarov. – Qonunbuzilish holatlarini sodir etgan shaxslarga qonunchilikda belgilangan muddatlarda 866 nafar huquqbuzar tomonidan 259,92 gektar yer maydonlari ixtiyoriy ravishda davlat zaxirasiga qaytarildi. Qolgan 78 ta holatda 1,60 gektar yer maydoni fuqarolik bo‘yicha sud tomonidan majburiy tartibda bartaraf etilib, jami 944 ta holatda 261,5 gektar yer maydonlari o‘z holatiga qaytarildi.
Yer va undan foydalanish tartiblari qonun bilan to‘liq tartibga solingan. Biroq nazorat tadbirlari davomida joylarda yer bilan bog‘liq qonunbuzilish holatlari sodir etilayotgani aniqlandi.
Buning oldini olish uchun doimiy nazorat ishlari olib borilmoqda. Shu bilan bir qatorda hafta yakunida sohada olib borilayotgan ishlar tahlil etilib, galdagi vazifalar belgilanmoqda. Sohada faoliyat olib borayotgan hududiy tuman, shahar bo‘limlari inspektorlari uchun o‘quv seminarlari tashkil etilib, ularning malakasi oshirilmoqda.
Sohaga yangi yo‘nalishlarning joriy etilishi esa ishimizni yanada jadallashtirishga imkon bermoqda.
O‘tgan yil mobaynida yer bilan bog‘liq qonunbuzilish holatlariga yo‘l qo‘ygan 3 ming 491 nafar fuqaroga nisbatan ma’muriy huquqbuzarlik holati aniqlanib, ularning 2 ming 665 nafariga 4 mlrd. 954 mln. so‘m miqdoridagi jarima chorasi qo‘llanildi.
Shuningdek, yuqoridagi qaror ijrosini ta’minlash maqsadida xalqaro standartlarga javob beradigan maxsus “E-yer nazorat” (ID) dasturi amaliyotga kiritildi. Uning asosiy maqsadi yerga aloqador qonunbuzilish holatlarini sodir etgan shaxslar to‘g‘risidagi ma’lumotlar bazasini shakllantirishdan iboratdir. Bunda tegishli yer maydoni, joylashgan manzili, qachon va qaysi qonun buzilgani, ko‘rilgan choralar xususida sud, prokuratura, IIB, MIB va boshqa hamkor tashkilotlar bilan ma’lumotlar almashish imkoniyati yaratilib, hozirda ushbu dasturdan keng foydalanilmoqda
Bu boradagi muammolarni bartaraf etishda qonuniy targ‘ibot va tushuntirish ishlarining samarasi juda katta. Shu bois aholiga yerdan foydalanish tartiblari yuzasidan murojaatlar, ogohlantirishlar berish bilan bir qatorda joylarda mahalla raislari va mas’ul xodimlar bilan tushuntirish ishlarini ham olib boryapmiz.
Yer bilan bog‘liq muammolar va qonunbuzilish holatlarining oldini olishda fuqarolarning huquqiy bilimini oshirish asosiy maqsadlarimizdan biridir.
O‘zA muxbiri Shuhrat Suyarov yozib oldi.
