Ijtimoiy tarmoqlarda yerini undan tortib olishayotganidan norozi fuqaroning murojaati ayrim muhokamalarga va tushunmovchiliklarga sabab bo‘ldi.
Aslini bilmay turib xulosa qilishga shoshilmang!
Videoda daʼvo qilinayotgan yer maydoni Toshkent shahri, Shayxontohur tumani, Ibn Sino MFY, Toshkent halqa avtomobil yo‘li ko‘chasi manzilida joylashgan.
Videoda “yerimni tortib olishyapti” deb davo qilayotgan fuqaro N.A. aslida ushbu yerni 2017 yildan buyon o‘zboshimchalik bilan egallab noqonuniy foydalanib kelgan. Boz ustiga mazkur yerda maysa (gazon) yetishtirib sotish amaliyotini yo‘lga qo‘ygan.
O‘tgan davr davomida davlatga tegishli bo‘lgan yer maydonidan foydalanib, daromad topib kelgan bo‘lsada, ushbu davrlar uchun yer solig‘i to‘lanmagan.
Qolaversa, ushbu yer maydoni nafaqat fuqaro N.A.ga balki, muqaddam biror bir shaxsga mulk yoki ijara huquqi asosida foydalanishga berilmagan. Yer maydoni tuman hokimligi zaxirasida bo‘lgan.
Mazkur yer Toshkent shahar hokimining 2022 yildagi tegishli qarori bilan Shayxontohur tumani aholi bandligiga ko‘maklashish markaziga “Vaqtinchalik ishlarni tashkil etish byurosi”ni qurish uchun doimiy foydalanish huquqi bilan qonun doirasida ajratib berilgan.
Bu esa, ushbu yerga o‘zining rejalari bo‘lgan (videoda yerga quyilgan fundamentlardan ko‘rishingiz mumkin) fuqaro N.A.ga yoqmagan va natijada ijtimoiy tarmoqlarga “Mening yerimni tortib olishyapti” qabilidagi davlat idoralari va mansabdorlarini obro‘sizlantirish kayfiyatiga ega bo‘lgan videomurojaatni yo‘llagan.
Yaʼni, fuqaro N.A. ushbu yer maydoniga egalik huquqi bo‘lmasa-da go‘yoki
yeri tortib olinayotganligi to‘g‘risida yolg‘on maʼlumot berib, keng jamoatchilikni chalg‘itishga va o‘zini “jabrlanuvchi” qilib ko‘rsatishga harakat qilgan.
Aslida O‘zbekiston Respublikasining Maʼmuriy javobgarlik to‘g‘risidagi kodeksi 60-moddasida yer uchastkalarini o‘zboshimchalik bilan egallab olganlik, shu jumladan ushbu yer uchastkalariga nisbatan qonuniy huquqlari mavjud bo‘lmagan holda ulardan foydalanganlik uchun maʼmuriy javobgarlik belgilangan. Ushbu turdagi huquqbuzarlik uchun fuqaroga BHMning 25 baravari miqdorida jarima solinishi ham mumkin edi.
Qonunchiligimizda zaxiradagi yerlarni bemalol egallab olish, undan istalgancha foydalanish mumkin degan tushunchalar aslo yo‘q.
Zero qonunchiligimizda yer ajratishning qonuniy va shaffof mexanizmlari belgilangan.
Kadastr agentligi fuqaro hamda tadbirkorlardan yerlarni o‘zboshimchalik bilan egallab olmaslikni hamda noqonuniy qurilishlar qilmasliklarini, OAV vositalari vakillaridan esa tasdiqlanmagan va yolg‘on maʼlumotlarni tarqatmasliklarini so‘raydi.
Yer umummilliy boylikdir, undan oqilona foydalanish zarur va u davlat muhofazasidadir.
