Oliy Majlis Qonunchilik palatasining navbatdagi majlisida «Ko‘chmas mulkka bo‘lgan huquqlarni davlat ro‘yxatidan o‘tkazish to‘g‘risida»gi qonun loyihasi birinchi o‘qishda muhokama qilindi.
Ushbu hujjat Prezidentimizning 2020 yil 7 sentyabrdagi «Yer hisobi va davlat kadastrlarini yuritish tizimini tubdan takomillashtirish chora-tadbirlari to‘g‘risida»gi farmoni hamda «O‘zbekiston Respublikasi Davlat soliq qo‘mitasi huzuridagi Kadastr agentligi faoliyatini tashkil etish chora-tadbirlari to‘g‘risida»gi qarori ijrosini taʼminlash maqsadida ishlab chiqilgan.
Taklif etilayotgan qonun loyihasida ko‘chmas mulkka bo‘lgan huquqlar davlat reyestri, ro‘yxatdan o‘tkazish ishini va biznes jarayonlarni elektron shaklda axborot tizimlari orqali yuritish, ko‘chmas mulkka bo‘lgan huquqlarni davlat ro‘yxatidan o‘tkazish harakatlarini amalga oshirishni rad etish asoslarining aniq ro‘yxati, vakolatli organlar qarori asosida ko‘chmas mulkka taqiq qo‘yilganda bu haqda huquq egalarini xabardor etish ko‘zda tutilmoqda.
Shuningdek, yer hisobini yuritishda huquqlarni davlat ro‘yxatidan o‘tkazish ketma-ketligini belgilash taklif etilyapti. Bunda Yer kodeksiga muvofiq, yerga bo‘lgan huquq davlat ro‘yxatidan o‘tkazilishi, ko‘chmas mulk bilan bitim tuzilishiga qadar unga bo‘lgan huquq davlat ro‘yxatidan o‘tkazilishi taʼminlanadi.
Majlisda aytib o‘tilganidek, qonun loyihasining qabul qilinishi ko‘chmas mulkka bo‘lgan huquqlarni davlat ro‘yxatidan o‘tkazish bilan bog‘liq bo‘lgan qoidalarning o‘zaro muvofiqlashtirilmagan normalarini bartaraf etish imkonini yaratadi.Qizg‘in bahs-munozaralar, savol-javoblardan so‘ng qonun loyihasi deputatlar tomonidan konseptual jihatdan qabul qilindi.
