Mamlakatimiz hududida mavjud davlat geodeziya tarmog‘i punktlarining umumiy soni 57 ming 951 tadan iborat bo‘lib, joriy yilda ushbu davlat geodeziya punktlari holati Qoraqalpog‘iston Respublikasi, Namangan, Toshkent, Sirdaryo, Jizzax, Samarqand, Navoiy, Buxoro va Surxondaryo viloyatlarida 5 ming ta geodeziya punktlari va 1 738 ta nivelir belgilari holati o‘rganildi. Davlat geodeziya tarmog‘i punktlari yetarli bo‘lmagan hududlarida 47 ta geodezik punktlar o‘rnatildi.
Shuningdek, Samarqand va Qashqadaryo viloyatlari hududida joylashgan “Oqboytol-Shofirkon” hamda “Samarqand-G‘uzor” davlat nivelir tarmog‘i punktlarini tiklash maqsadida 735 km 1-sinf nivelirlash, 984 km masofada 2-sinf nivelirlash ishlari yakunlandi.
Hududlarda investitsiya loyihalarining ko‘payishi natijasida Geodeziya punktlaridan foydalanuvchilar soni ham keskin oshdi.
Ushbu sohada raqamli texnologiyalar asosida xizmat ko‘rsatish maqsadida Agentlik tomonidan 50 ta doimiy ishlovchi GNSS KORS stansiyalari ishga tushirilib, ulardan differensial tuzatmalar real vaqtda uzatilmoqda.
O‘zbekiston Respublikasi Prezidentining joriy yil 20-oktabrdagi PQ-405-son qaroriga asosan ushbu stansiyalar soni yana 80 taga ko‘paytirilishi va signallar bilan ta’minlash qamrovini kengaytirish belgilandi.
Respublika aerogeodeziya markazi tomonidan joriy yilda 65 051 kv.km maydonda aerosuratga olish ishlari amalga oshirildi va ushbu aerosuratlardan foydalanib jami 2 477 dona 1:10 000 masshtabdagi ortofotoplanlar yaratildi. Shuningdek, Qoraqalpog‘iston Respublikasi, Buxoro, Jizzax, Sirdaryo, Surxondaryo va Toshkent viloyatlarining jami 117,4 ming kv.km maydonda 1:25 000 masshtabdagi topografik xaritalari yangilandi, 12 ta viloyat hamda Qoraqalpog‘iston Respublikasi chegara chiziqlarining 1: 25 000 masshtabdagi topografik xaritalari va 528 ta albomlari tayyorlandi.
2022-yil 1-yanvar holatiga Respublikamiz Yer fondi ma’lumotlariga asosan jami 8 ta toifadagi yerlar 44 mln 892 ming gektarni tashkil etadi.
Ushbu fondga kiritilgan jami 208 tuman va shaharlardan 165 tumanda xatlov ishlari amalga oshirildi. 2022-yil 20-dekabr holatiga 137 ta tumanda xatlov ishlari yakunlanib, yer fondi ma’lumotlari yangilandi va foydalanuvchilarga yetkazildi. Qolgan 28 ta tumanda xatlov ishlari 2023-yilda to‘liq yakunlanib, Yer resurslarining holati bo‘yicha tahliliy ma’lumotlar va hisobotlar tayyorlanadi.
Geografik obyektlarga nom berish va ularni qayta nomlash bo‘yicha hududiy komissiyalar tomonidan Kadastr agentligining ekspert komissiyasiga 48 897 ta nom ekspertizadan o‘tkazish uchun taqdim etildi. Shundan, 36 006 ta geografik obyektlar nomlariga qonunchilik hujjatlariga muvofiqligi yuzasidan ijobiy ekspert xulosalari berildi. 12 891 ta nom qonunchilik hujjatlari talablariga javob bermaganligi sababli qayta ko‘rib chiqish uchun hududiy komissiyalarga qaytarildi.
Bundan tashqari, viloyat, tuman (shahar) xalq deputatlari Kengashlarining tegishli qarorlari bilan tasdiqlangan 37 139 ta nom o‘rganib chiqildi. Shundan, qonunchilik hujjatlariga muvofiq bo‘lgan 35 560 ta nom Geografik obyektlar nomlarining davlat reyestri bazasiga kiritildi. 1 579 ta nom qonunchilik hujjatlari talablariga nomuvofiq deb topilib, qayta ko‘rib chiqish uchun hududiy komissiyalarga qaytarildi.
Hozirgi kunda davlat reyestrida 158 235 ta geografik obyektlarning nomlari jamlangan bo‘lib, shundan 2 883 ta ma’muriy-hududiy birliklar nomlari, 147 132 ta aholi punktlari va ularning tarkibiy qismlari nomlari, 2 430 ta transport va muhandislik-texnika infratuzilmasi obyektlari nomlari va 5 790 ta tabiiy obyektlar nomlarini tashkil qiladi.
