Davlatimiz rahbarining 2020 yil 7 sentyabrdagi farmoni va PQ-4819-sonli qarori asosida Kadastr agentligi tizimida Komplayens-nazorat xizmati tashkil etildi.
Xo‘sh, komplayens – nazorat xizmatini tashkil etishdan ko‘zlangan maqsad nima? Ushbu xizmat turi qanday vazifalarni bajaradi?Shu kabi savollar yuzasidan Kadastr agentligi Komplaens-nazorat xizmati bo‘limi boshlig‘i Baxtiyor Shomansurovni suhbatga chorladik.
— Komplayens-nazorat xizmati qanday mexanizm?
— Komplayens nazoratining asosiy vazifasi – davlat va xo‘jalik boshqaruvi organlari, xo‘jalik yurituvchi sub’ektlar faoliyatini xalqaro standartlar, qonun va boshqa me’yoriy huquqiy hujjatlarga muvofiq tashkil etuvchi, korrupsiya xavf-xatarlari, manfaatlar to‘qnashuvini o‘z vaqtida aniqlash va chek qo‘yish, qonun buzilishi va korrupsiyaga oid huquqbuzarliklar haqida xabar berishdir.
Shuningdek, Davlat organlari va tashkilotlarning hisobdorligi va faoliyatining shaffofligini oshirish, xodimlar tomonidan kasbiy odob-axloq qoidalariga qat’iy rioya etish va xizmat vazifalarini bajarishda manfaatlar to‘qnashuvi haqida xabar berish va ularni hal qilish masalalarini tartibga solish hisoblanadi. Korrupsiyaga qarshi kurashishda uning oqibatlari bilan emas, balki uni keltirib chiqarayotgan sabablarni aniqlash va bartaraf etish samaraliroq. Komplayens-nazorat xizmati ana shunday mexanizmdir.
— Kadastr agentligi markaziy apparatida Komplayens-nazorat xizmati shtatlariga qanday xodimlar ishga qabul qilindi?
— Kadastr agentligi markaziy apparatida Komplayens-nazorat xizmati shtatlar jadvali tashkil qilinib, ushbu xizmatga malakali, huquqni muhofaza qiluvchi idoralarida ijobiy tavsif bilan xizmat olib borgan tajribali xodimlar ishga qabul qilingan.
Shuningdek, Kadastr agentligida 17 ta Davlat kadastrlari palatasida 16 ta Komplayens-nazorat xizmatining shtat birliklari tashkil etildi.
2021 yilning avgust oyida Kadastr agentligi hududiy boshqarmalari va Davlat kadastrlari palatasining markaziy apparatidagi Komplayens-nazorat xizmatiga Korrupsiyaga qarshi kurashish agentligi bilan hamkorlikda tanlov asosida jami 14 ta xodimlar tanlab olindi.
— Kadastr agentligi Korrupsiyaga qarshi kurashish agentligi bilan hamkorlikda qanday ishlarni amalga oshirib kelmoqda?
— O‘zbekiston Respublikasi Davlat soliq qo‘mitasi huzuridagi Kadastr agentligi va O‘zbekiston Respublikasi Korrupsiyaga qarshi kurashish agentligi o‘rtasida 2020 yilning dekabr oyida o‘zaro hamkorlik Memorandumi tuzildi. Kadastr agentligining Komplayens-nazorat xizmati o‘ziga yuklatilgan vazifalar doirasida korrupsiyaga qarshi kurashish bo‘yicha maxsus vakolatli idoralar bilan o‘zaro hamkorlik o‘rnatdi.
Tizimda korrupsiyaning oldini olish borasida xodimlar kesimida uchrashuv, seminar va davra suhbatlari orqali hamda ijtimoiy tarmoqlar orqali 300 dan ortiq umumprofilaktik tadbirlar o‘tkazildi.
Bundan tashqari, kelib tushgan murojaatlarni o‘rganish jarayonida va olingan ma’lumotlarga asoslangan holda Agentlik tizimidagi 100 nafardan ortiq xodimga nisbatan yakka tartibda profilaktik tadbirlar tashkil qilindi.
Shuningdek, boshqarma boshliqlari va xodimlar tomonidan korrupsiya holatlariga yo‘l qo‘ymaslik, xizmat davrida korrupsiyaviy holatlarning oldini olish bo‘yicha ularning har biridan tilxat hamda kafolat xatlari olindi.
Andijon, Navoiy, Samarqand, Sirdaryo, Farg‘ona va Xorazm viloyatlarida jismoniy va yuridik shaxslar tomonidan xususiy mulkni davlat ro‘yxatidan o‘tkazish jarayonlarida korrupsiya holatlarini keltirib chiqarishi mumkin bo‘lgan ehtimoliy xavflarni «Sirli mijoz» tamoyili asosida aniqlash tadbirlari o‘tkazildi hamda boshqa hududlarda ham davom ettirilmoqda.
Korrupsiyaga qarshi kurashish maqsadida mahalla fuqarolari yig‘ini binolariga Kadastr agentligining Ishonch telefoni aks ettirilgan namunaviy bannerlar joylashtirildi.
— Xodimlarning korrupsion harakatlari ustidan qanday nazorat olib borilmoqda?
— Noqonuniy harakatlar ustida 90 dan ortiq murojaat va shikoyat xatlari kelib tushgan bo‘lib, ushbu murojaatlarni o‘rganib chiqish natijasida qonuniy va adolatli hal qilinganlari bo‘yicha 20 nafarga yaqin murojaat egalari tomonidan tashakkurnomalar berilgan. O‘z tasdig‘ini topmagan 17 ta holatda murojaat mualliflariga nisbatan tuhmat qilganligi munosabati bilan tegishli tashkilotlarga ma’lumotlar kiritilgan.
Kadastr agentligi tizimida mehnat faoliyatini olib borayotgan 15 nafardan ortiq xodimning noqonuniy harakatlari bo‘yicha to‘plangan hujjatlar huquqni muhofaza qiluvchi organlarga yuborilgan.
Agentlik tizimida jinoiy javobgarlikka tortilib, o‘z xizmat faoliyatini yuritib kelayotgan xodimlar mavjudligi aniqlangan, ushbu xodimlarning qilgan qilmishlari va ularning ijtimoiy xavflilik darajasidan kelib chiqib, egallab turgan lavozimiga loyiqligi ko‘rib chiqilmoqda.
Xulosa o‘rnida ta’kidlash joizki, Korrupsiya o‘rnida shaffoflik bo‘lsa, barcha sohalarning darajasi o‘zgaradi, ya’ni sifati oshadi. Shu sabab korrupsiyaga qarshi kurashish sohasida jamoatchilik nazorati mexanizmlarini yanada kuchaytirishimiz zarur.
N. Rahmonova yozib oldi, O‘zA
