Bugungi kunda har bir vazirlik, boshqarma va tashkilotlarda ochiqlikni ta’minlash, xalqning hukumatga ishonchini oshirish, fuqarolarni rozi qilish davlatning asosiy vazifalaridan biridir.
Birgina Nukus shahridagi “Jana bazar” mahalla fuqarolar yig‘inida olib borilayotgan keng ko‘lamli o‘zgarishlar buning yaqqol isbotidir. Sababi bu mahalladagi har bitta xonadon egalari uylarining kadastr hujjatlariga ega bo‘ldi.
O‘zbekiston Respublikasi Vazirlar Mahkamasining 2021 yil 19 aprel kuni “2021-2022 yillarda Qoraqalpog‘iston Respublikasining Nukus shahridagi sharoiti og‘ir mahallalarda ijtimoiy-iqtisodiy, maishiy va infratuzilma holati bilan bog‘liq muammolarni hal etish chora-tadbirlari to‘g‘risida”gi qarori qabul qilindi.
Ushbu qarorda ko‘rsatilgan Nukus shahridagi “Qos ko‘l”, “Qos ko‘l 2”, “Qos ko‘l 3”, “Qos ko‘l 4”, “Chimboy guzori”, “Bo‘z ovul”, “Qizil qum”, “Amudaryo”, “Qutli makon”, “Samanbay”, “Aq jag‘is”, “Oydin yo‘l”, “Telemarkaz” mahalla fuqaro yig‘inlarida o‘zboshimchalik bilan tartibsiz qurilgan turar joylarni o‘rganib chiqish va kadastr hujjatlarini rasmiylashtirish uchun ishchi guruh tuzildi. Shundan keyin Davlat kadastrlari palatasi Qoraqalpog‘iston Respublikasi Nukus shahri filiali mutaxassislari tomonidan xatlov ishlari amalga oshirildi. Ushbu mahalla fuqaro yig‘inlarida aniqlangan o‘zboshimchalik bilan qurilgan 4022 ta turar joyning kadastr hujjati yo‘qligi aniqlandi va to‘plangan ma’lumotlar ishchi guruh tomonidan ko‘rib chiqilib, mulk huquqi beruvchi xulosa tayyorlandi. So‘ng davlat xizmatlari markazlariga ariza berilib, davlat ro‘yxatidan o‘tkazildi, kadastr hujjati rasmiylashtirildi.
Shuningdek, joriy yil o‘tgan davri mobaynida ko‘chmas mulk obyektlarini davlat ro‘yxatidan o‘tkazish uchun jismoniy va yuridik shaxslar tomonidan jami 39 ming 747 ta ariza kelib tushdi. Shundan 733 ta ariza davlat xizmatlari markazlari tomonidan, 2 ming 884 ta ariza ma’lum sabablarga ko‘ra bekor qilindi. 1 ming 586 ta ariza jarayonda, 34 ming 544 ta arizaga asos ko‘chmas mulk obyektlari va 1 ming 605 ta ipoteka va ijara shartnomasi davlat ro‘yxatidan o‘tkazildi.
Davlat kadastrlari palatasi Qoraqalpog‘iston Respublikasi boshqarmasida Prezidentimiz boshchiligida joriy yilning 18 iyul kuni o‘tkazilgan videoselektorida kadastri yo‘q bo‘lgan 2 million 600 ming turar joyga kadastr hujjatlarini tayyorlash bo‘yicha ishchi guruh tuzilib, xatlov ishlari boshlab yuborildi.
Xatlov ishlari bo‘yicha mutaxassisga tushuncha va aniq vazifalarni belgilab berish maqsadida boshqarmada seminar tashkil qilindi. Unda arxiv hujjatlarni o‘rganish va kadastr hujjati bo‘lmagan turar joylarning elektron ro‘yxatini shakllantirib, “O‘zkad” tizimiga kiritish bo‘yicha topshiriqlar berildi.
Kadastr sohasida fuqarolarning ishonchini oqlash, ularning hurmatini qozonish borasida aniq va sifatli xizmat ko‘rsatish, shuningdek murojaatlarni ijobiy hal etish bo‘yicha tizimli ishlar amalga oshirilmoqda.
U.Jalelov,
Davlat kadastrlari palatasi Qoraqalpog‘iston Respublikasi boshqarmasi boshlig‘i.
O‘zA
