Ma’lumki, korrupsiya dunyo miqyosidagi global muammolardan biri hisoblanadi. Xo‘sh, korrupsiyaning oldini olish bo‘yicha Kadastr agentligida qanday chora-tadbirlar amalga oshirilmoqda? Kadastrni korrupsiyadan xoli sohaga aylantirish imkoni bormi? Ushbu savollarimizga Kadastr agentligi Toshkent shahar boshqarmasining Komplaens-nazorat xizmati bosh mutaxassisi Hasan Nosirov javob berdi.
"Aslini olib qarasak, bu illatga qarshi kurashishda uning oqibatlari bilan emas, balki uni yuzaga keltiruvchi sabablarni aniqlash va bartaraf etish maqsadga muvofiq sanaladi, – dedi H.Nosirov. – Shuning uchun korrupsiyaga qarshi kurashish sohasida davlat va xususiy sektor ishtirokchilarining xalqaro standartlar va qonun hujjatlari yo‘nalishlariga asosan samarali faoliyat yuritishini ta’minlash maqsadida komplaens-nazorat tizimi yo‘lga qo‘yilgan.
Bu tizim korrupsiya xavf-xatarlari, manfaatlar to‘qnashuvini o‘z vaqtida aniqlash hamda ularga chek qo‘yish, korrupsiyaga oid huquqbuzarliklar haqida xabar berish kabi qator profilaktik choralarni o‘z ichiga oladi.
Kadastr agentligi va Davlat kadastrlari palatasining Toshkent shahar boshqarmalari va uning tarkibidagi barcha tuman filiallari xodimlari o‘rtasida korrupsiyaga qarshi murosasiz kayfiyatni shakllantirish, eng muhimi, tizimni «Korrupsiyadan xoli soha»ga aylantirish bo‘yicha bir qator chora-tadbirlar amalga oshirilmoqda.
Ayni maqsadda soha xodimlari orasida ichki tartib-nizomlarga rioya qilish, vakolatlarini suiiste’mol qilmaslik, manfaatlar to‘qnashuviga yo‘l qo‘ymaslik, tamagirlikka berilmaslik, xizmat vazifalariga sovuqqonlik bilan yondashmaslik, ayrim fuqarolar tomonidan xodimga nisbatan bosim o‘tkazish yoki o‘zlari tomonidan moddiy manfaat taklif qilib evaziga murojaatlarini ijobiy ravishda ko‘rib chiqishlarini so‘rab, sinov holatlariga tushib qolmasliklari uchun profilaktik suhbatlar o‘tkazilyapti.
Aniq raqamlarga e’tibor qaratadigan bo‘lsak, joriy yilning o‘tgan 11 oyi davomida Kadastr agentligi Toshkent shahar boshqarmasi komplaens-nazorat xizmati tomonidan amalga oshirilgan tadbirlarda asosiy e’tibor profilaktik tadbirlarga qaratildi. Shuningdek, korrupsion holatlarga yo‘l qo‘ygan xodimlarni aniqlab, ularga nisbatan tegishli choralar ko‘rildi.
Jumladan, 2022 yilning 11 oyi davomida xodimlar orasida 40 ta umum profilaktik tadbirlar hamda 20 nafar xodimga nisbatan yakka tartibda ogohlantirish tadbirlari amalga oshirildi. Ushbu tadbirlar doirasida 500 nafardan ziyod xodimlar ishtirok etdi.
Shuningdek, bu borada ommaviy axborot vositalarida 40 dan ortiq materiallar e’lon qilindi. Shahar-tuman bo‘lim filiallari rahbarlari tomonidan o‘tkazilgan rejaviy yig‘ilishlarda korrupsiyaga qarshi kurashish bo‘yicha tushuntirish-profilaktik tadbirlarini o‘tkazish amaliyoti joriy etildi.
O‘tkazilgan umum profilaktik tadbirlarda korrupsiya jinoyatining oqibatlari, sohada kuzatilayotgan korrupsion holatlar tahlil qilinib, yig‘ilganlarga yetkazilishiga qaramay ayrim xodimlar tomonidan sohaga dog‘ tushirish holatlari uchrab turibdi.
O‘tgan vaqt mobaynida boshqarma ishonch telefoni va veb-sayti orqali kadastr xodimlariga nisbatan korrupsion holatlar yuzasidan 10 dan ortiq turli ma’lumotlar kelib tushgan. Olib borilgan surishtiruv va xizmat tekshiruvlari natijasida aksariyat korrupsion holatlar tasdig‘ini topdi, ayrimlariga nisbatan qayta tekshiruv ishlari davom etmoqda.
Kelib tushgan ma’lumotlar yuzasidan 7 nafar xodim bilan mehnat shartnomasi bekor qilindi. Jumladan, Davlat kadastrlari palatasi Toshkent shahar boshqarmasiga M.Ulug‘bek tumani, "Podshobog‘" MFY, "Anjirabod" ko‘chasi, 10-uyda istiqomat qiluvchi fuqaro nomidan murojaatnoma kelib tushgan.
Ariza mazmuniga ko‘ra, DKP Toshkent shahar boshqarmasi M.Ulug‘bek tumani filiali Kadastr yig‘ma jildlarini tayyorlash bo‘limi kadastr muhandisi S.M. tomonidan murojaatchiga tegishli bo‘lgan xonadon (Toshkent shahri, M.Ulug‘bek tumani, "Do‘rmon yo‘li" ko‘chasi, 5a-uy) yonidan qarovsiz yerga fuqaro M.Sh. nomiga kadastr yig‘ma jildini noqonuniy ravishda shakllantirib bergan. S.M.ga nisbatan xizmat tekshiruvi olib borilganda, da’vo arizasi qisman o‘z tasdig‘ini topdi va unga nisbatan intizomiy chora ko‘rildi.
