Ma’lumki, joriy yilning 18 iyul kuni Prezidentimiz raisligida o‘tkazilgan yig‘ilishda yurtimizda 2 million 600 mingta xonadonning kadastr hujjatlari mavjud emasligi ta’kidlandi va kadastri yo‘q xonadonlar masalasini uzil-kesil hal qilish uchun alohida qonun loyihasi ishlab chiqish belgilandi.
O‘zbekiston Respublikasi Prezidenti Administratsiyasi huzuridagi Axborot va ommaviy kommunikatsiyalar agentligida o‘tkazilgan brifingda Kadastr agentligi axborot xizmati rahbari Ne’matjon Atamuratov tomonidan taqdim etilgan ma’lumotlarga ko‘ra, 2022 yil 1 oktyabrga qadar kadastr hujjatlari yo‘q 2, 6 million xonadonning elektron bazasi shakllantirilib chiqiladi hamda uy-joyga bo‘lgan huquqlarni e’tirof etishga asos bo‘luvchi hujjatlar to‘planadi va elektron bazaga kiritiladi.
Mutaxassisning so‘zlariga ko‘ra, hokimliklarning qishloq xo‘jaligiga mo‘ljallangan yerlarni ijaraga berish bo‘yicha ochiq elektron tanlov yakunlarini tasdiqlash vakolati bekor qilindi. Endilikda qishloq xo‘jaligiga mo‘ljallangan yer uchastkalari fermer xo‘jaligini yuritish uchun ilgari ochiq tanlov asosida berilgan bo‘lsa, endilikda ochiq elektron tanlov orqali beriladi. Yer uchastkalariga bo‘lgan huquqlar davlat ro‘yxatiga olinganligi to‘g‘risida hujjatlar davlat reyestridan elektron ko‘chirma beriladi.
Qayd etilishicha, yer uchastkasidan belgilanganidan boshqa maqsadlarda foydalanganda Kadastr agentligi organlari yer egasini yoki yerdan foydalanuvchini oldindan xabardor qilgandan keyin yer uchastkasiga bo‘lgan huquqni bekor qilish haqida sudga da’vo arizasi kiritishi belgilandi.
Shuningdek, qonunchilikka ko‘ra, jismoniy va yuridik shaxslarga meros qilib qoldiriladigan umrbod egalik qilish, doimiy egalik qilish, doimiy foydalanish, muddatli (vaqtincha) foydalanish yoki ijara huquqi asosida tegishli bo‘lgan yer uchastkalarini yoki ularning qismlarini kompensatsiya evaziga jamoat ehtiyojlari uchun olib qo‘yish tartib-taomillari ham belgilab qo‘yildi.
Nogironligi bo‘lgan shaxslarga va nogironligi bo‘lgan oilalarga elektron onlayn-auksionda yer uchastkalarini sotib olish bilan bog‘liq xarajatlarning o‘rni Vazirlar Mahkamasi tomonidan belgilangan tartibda qoplanadi.
“Davlat kadastrlari to‘g‘risida”gi qonunning 10-moddasiga o‘zgartirish kiritilib, Kadastr agentligi Milliy geografik axborot tizimini yuritish sohasida maxsus vakolatli organ hisoblanadi.
