22-aprel — Butunjahon Yer kuni
Avval xabar berganimizdek bugun 2025-yil 22-aprel kuni, Kadastr agentligi tomonidan “Yer – kelajak avlodlarimizga ham tegishli bo‘lgan boylikdir” shiori ostida Respublika Aerogeodeziya Markazida Butunjahon Yer kuniga bag‘ishlab katta miqyosdagi tadbir tashkil etildi.
Tadbirning asosiy maqsadi:
Yer resurslariga bo‘lgan e’tiborni oshirish;
Yosh avlodda yerga nisbatan hurmat va ehtiyotkorlik g‘oyasini shakllantirish;
Kadastr, geodeziya va kartografiya sohalaridagi yutuqlarni keng jamoatchilikka yetkazish.
Tadbir doirasida quyidagi yo‘nalishlar bo‘yicha faoliyatlar o‘tkazildi:
Karyera kuni — yoshlar uchun maxsus tashkil etilgan ushbu maydonda soha tashkilotlari bo‘sh ish o‘rinlari va loyihalari bilan tanishtirdi.
Tarixiy xaritalar ko‘rgazmasi — arxiv hujjatlari orqali yer ilmining o‘tmish sahifalari namoyish etildi.
Geodezik asbob-uskunalar namoyishi — zamonaviy texnologiyalar bilan bevosita tanishish imkoni yaratildi.
Ilmiy-amaliy konferensiya — soha mutaxassislari o‘z tajribalari bilan o‘rtoqlashdi. Tadbir davomida O‘zbekiston Fanlar akademiyasi Seysmologiya instituti bilan hamkorlik memorandumi imzolandi.
Madaniy dasturlar va ijodiy uchrashuvlar — mehmonlar uchun unutilmas lahzalar taqdim etildi.
Ramziy esdalik kitobi — mehmonlar o‘z tilak va mulohazalarini qoldirib, Yer kuniga doir tarixiy sahifaga o‘z hissasini qo‘shdi.
“Geodeziya, kartografiya, kadastr atamalarining izohli lug’ati” kitobining taqdimoti o'tkazildi.
Yer — bu bizning kelajagimiz. Uni asraylik!
