Bugun AOKAda o‘tkazilgan brifingda Kadastr agentligi axborot xizmati rahbari Ne’mat Atamuratov «O‘zbekiston Respublikasi Davlat soliq qo‘mitasi huzuridagi Kadastr agentligi faoliyatini yanada takomillashtirish chora-tadbirlari to‘g‘risida»gi Prezident qarori mazmun-mohiyati to‘g‘risida ma’lumot berildi:
O‘zbekiston Respublikasi Prezidentining 2022-yil 20-oktabrdagi PQ-405-son qarori bilan 2023–2026 yillarda Davlat soliq qo‘mitasi huzuridagi Kadastr agentligi organlari va tashkilotlari faoliyatining asosiy prognoz ko‘rsatkichlari tasdiqlandi.
Unga ko‘ra:
🔸 25 mln 169 ming gektar Yer uchastkalarini o‘lchash va ularning elektron xaritalarini yaratish;
🔸 8 mln 200 mingdan ortiq Bino va inshootlarni o‘lchash va ularning elektron bazasini yaratish;
🔸 9 370 ta mahallalar chegaralarini belgilash;
🔸 111 ta tumandagi yer resurslarini xatlovdan o‘tkazish;
🔸 1 665 ta Ma’muriy-hududiy birliklar chegaralarini belgilash va yana bir kator prognoz ko‘rsatkichlar belgilandi.
Qaror bilan fazoviy ma’lumotlar sohasida qabul qilinadigan standartlar ro‘yxati tasdiqlandi.
Shuningdek, 2023 yil 1 yanvardan boshlab:
Kadastr agentligining Qoraqalpog‘iston Respublikasi, viloyatlar va Toshkent shahar boshqarmalari, tuman (shahar) bo‘limlari, Kadastr agentligi Davlat kadastrlari palatasi, uning hududiy boshqarmalari va tuman (shahar) filiallari faoliyatini tashkil etish, nazorat qilish va ularga umumiy rahbarlik qilish vertikal boshqaruv tizimi hamda yakkaboshchilik asosida Kadastr agentligi tomonidan amalga oshirilishi belgilandi.
Kadastr agentligining hududiy bo‘limlari, Davlat kadastrlari palatasi hududiy boshqarmalari va tuman (shahar) filiallarining qonuniy faoliyatiga mahalliy davlat hokimiyati organlari tomonidan aralashish yoki ta’sir o‘tkazish qat’iy taqiqlanadi.
“Geoinnovatsiya markazi” DUK tuzilmasida geodeziya va kartografiya sohasida qo‘llaniladigan o‘lchash vositalarini qiyoslash va kalibrlash laboratoriyasi, kadastr sohasida ilmiy darajali kadrlarni tayyorlash bo‘yicha tayanch doktorantura faoliyati, Fazoviy ma’lumotlar sohasida standartlash boshqarmasi hamda Ilmiy tadqiqot faoliyatini muvofiqlashtirish bo‘limi tashkil etilishi belgilandi.
Ma’muriy javobgarlik to‘g‘risidagi kodeksga muvofiq Kadastr agentligi organlariga taalluqli bo‘lgan ma’muriy huquqbuzarliklar to‘g‘risidagi ishlarni ko‘rib chiqishda ma’muriy huquqbuzarlik to‘g‘risidagi bayonnomani Ichki ishlar vazirligining “E-ma’muriy ish” tizimi bilan to‘liq integratsiya qilingan maxsus mobil dastur orqali elektron hujjat shaklida tuzish imkoniyatini yaratilishi belgilandi.
Qaror bilan quyidagi ishlarni bajarish belgilandi:
🔹 Kadastr agentligi tizimida kadrlarni qayta tayyorlash va ularning malakasini oshirish markazini tashkil etish;
🔹 Geodeziya va kartografiya sohasida qo‘llaniladigan o‘lchash vositalarini qiyoslash va kalibrlash ishlarini tashkil etish;
🔹 2023–2025-yillarda O‘zbekiston Respublikasi hududida Milliy koordinatalar tizimini joriy etish;
🔹 Davlat koordinatalar tizimidan (SK-42) butunjahon koordinatalar tizimiga (WGS-84) o‘tish parametrlarini ishlab chiqish;
🔹 Yer resurslarini xatlovdan o‘tkazish natijalari bo‘yicha ma’lumotlarni taqdim etish geoportalini yaratish.
Shu bilan birga qaror bilan Kadastr agentligi va uning tizimidagi tashkilotlarning tarkibiy tuzilmasiga o‘zgartirish va qo‘shimchalar kiritildi.
