Senatning navbatdagi yalpi majlisi oldidan Sud-huquq masalalari va korrupsiyaga qarshi kurashish qo‘mitasining majlisi bo‘lib o‘tdi.

Unda “Ko‘chmas mulkka bo‘lgan huquqlarni davlat ro‘yxatidan o‘tkazish to‘g‘risida”gi hamda “O‘zbekiston Respublikasining ayrim qonun hujjatlariga o‘zgartish va qo‘shimchalar kiritish to‘g‘risida”gi qonunlar muhokama qilindi.

Muhokama davomida “Ko‘chmas mulkka bo‘lgan huquqlarni davlat ro‘yxatidan o‘tkazish to‘g‘risida”gi Qonun fuqarolar va tadbirkorlarning ko‘chmas mulkka bo‘lgan huquqlari himoyasini yanada kuchaytirish hamda ishonchli himoya qilish maqsadida ishlab chiqilganligi, unda ko‘chmas mulkning turlari, ularga bo‘lgan huquqlar hamda cheklovlar, yer uchastkalariga bo‘lgan huquqni davlat ro‘yxatidan o‘tkazish va rad etish asoslari aniq belgilab berilayotganligi qayd etildi.

Shuningdek, ko‘chmas mulkka bo‘lgan huquqlarni davlat ro‘yxatidan o‘tkazishda vakolatli idoralarning vazifalari, vositachilarning o‘rni hamda ular ko‘rsatadigan xizmatlar belgilab berilmoqda.

Senatorlar tomonidan qayd etilganidek, muhokama qilinayotgan mazkur Qonun jismoniy va yuridik shaxslarning ko‘chmas mulkka bo‘lgan huquqlari davlat tomonidan kafolatlanishi, mulkdorlar huquqlarining ishonchli himoya qilinishiga xizmat qiladi.

Shundan so‘ng “O‘zbekiston Respublikasining ayrim qonun hujjatlariga o‘zgartish va qo‘shimchalar kiritish to‘g‘risida”gi Qonun muhokama qilindi.

Ta’kidlanganidek, mazkur Qonun bilan kiritilayotgan o‘zgartirishlar orqali “O‘zbekiston Respublikasi Oliy Majlisi Qonunchilik palatasining Reglamenti to‘g‘risida”gi hamda “Normativ-huquqiy hujjatlar to‘g‘risida”gi qonunlarda qonun loyihalarining muqaddimasida qonunni qabul qilish zarurati, sabablari va maqsadlari bo‘yicha tushuntirishlar berilishi, ularni  muhokama qilish hamda ularga ovoz berish tartibi ochib berilmoqda.

Ushbu Qonunning qabul qilinishi normativ-huquqiy hujjatlarni qabul qilish zaruratini, maqsadlarini hamda mohiyatini aholiga sodda va tushunarli shaklda yetkazishga xizmat qilishi qayd etildi.

Muhokamalarda ishtirokchilar o‘zlarini qiziqtirgan savollar bo‘yicha javoblarni olishdi.

Majlis yakunida Qo‘mita mazkur masalalar bo‘yicha tegishli qarorlar qabul qildi.