Kadastr agentligi Andijon viloyati boshqarmasi, uning tuman, shahar bo‘limlari tomonidan kadastr sohasiga oid qonun, farmon va qarorlar ijrosini ta’minlash, tizimda olib borilayotgan ishlar samaradorligini oshirish, yerlarning hisobini yuritish bo‘yicha muayyan ishlar amalga oshirilmoqda.

Viloyatda yerdan foydalanish va uni muhofaza qilish, ayniqsa, qishloq xo‘jaligi yerlaridan oqilona hamda samarali foydalanishni targ‘ib etishga qaratilgan keng ko‘lamli targ‘ibot ishlari olib borilmoqda. Shunga qaramasdan viloyatda yerdan noqonuniy foydalanish holatlari aniqlanmoqda. 

Kadastr agentligining Andijon viloyati boshqarmasi tizimida faoliyat ko‘rsatayotgan inspektorlar tomonidan o‘tkazilgan xatlovlar natijasida joriy yilning o‘tgan davrida 412 ta holatda 35,2 gektar yer maydonidan noqonuniy foydalanilayotganligi aniqlandi. Qayd etilgan 35,2 gektar yer maydoni o‘zboshimchalik bilan egallab olinganligi tahlil qilinganda, 5,54 gektar uy-joy, 3,06 gektari noturar joy, 3,64 gektari baliq hovuzi qurish, 3,81 gektari ko‘p yillik daraxtzor barpo etish hamda 19,07 gektari boshqa maqsadlar uchun egallanganligi ma’lum bo‘ldi. 

O‘zboshimchalik bilan egallab olingan yer maydonining 27,2 gektarini ekin maydoni, 3,1 gektar qismini aholi punktlari, 0,5 gektarini suv fondi, 3,9 gektarini zaxira hamda 0,5 gektarini sanoat, transport va boshqa yo‘nalishlardagi yerlar tashkil etdi. Yerga oid qonun buzilish holatlarining 220 tasi hududiy kadastr inspektorlari tomonidan olib borilgan tushuntirish-targ‘ibot ishlari natijasida bartaraf etildi. Bundan tashqari, 41 ta holatdagi o‘zboshimchalik bilan egallab olingan yerlarni rasmiylashtirish bo‘yicha prokuraturaga, 61 ta qonun buzilish holatini bartaraf etish maqsadida sud idoralariga da’vo arizalari kiritildi. 

Kadastr agentligi viloyat boshqarmasi mutasaddilarning ma’lum qilishicha, yerdan foydalanish bo‘yicha o‘rganishlar davom etmoqda.