Senatning Axborot siyosati va davlat organlarida ochiqlikni taʼminlash masalalari qo‘mitasining navbatdagi majlisi bo‘lib o‘tdi.
Unda O‘zbekiston Respublikasi Davlat soliq qo‘mitasi huzuridagi Kadastr agentligining sohaga oid qonunchilik ijrosi va o‘z faoliyatining ochiqligini taʼminlash borasida amalga oshirilgan ishlar to‘g‘risidagi axboroti eshitildi.
Taʼkidlanganidek, Agentlik faoliyati ochiqligi va shaffofligini taʼminlash borasida bir qator ijobiy ishlar amalga oshirilgan. Xususan, ochiq maʼlumotlarni rasmiy Veb-saytga joylashtirish bo‘yicha “kadastr.uz” Veb-saytining yangi dizayni ishlab chiqilgan va to‘liq ishga tushirilgan. Yangi saytda interaktiv xizmatlar soni ko‘paytirilgan.
O‘zbekiston Respublikasi Prezidentining 2021 yil 16 iyundagi PF-6247-sonli Farmoniga asosan maʼlumotlar har chorak yoki doimiy ravishda yangilab borilishi belgilangan.
Biroq tahlil Agentlik faoliyatida ochiqlikni taʼminlash, ochiq maʼlumotlar sifatida joylashtirilishi kerak bo‘lgan ijtimoiy ahamiyatga molik maʼlumotlarni Ochiq maʼlumotlar portali va o‘z rasmiy Veb-saytida joylashtirib borish ishlari talab darajasida emasligini ko‘rsatmoqda.
Masalan, davlat xaridlari to‘g‘risidagi maʼlumotlar, xarajatlar smetasi va uning ijrosi, xizmat safarlari va xorijdan tashrif buyurgan mehmonlarni kutib olish xarajatlari, litsenziya va ruxsat etish uchun masʼullar to‘g‘risida maʼlumot, xizmat uylari hamda boshqa zarur maʼlumotlarni jamoatchilikka eʼlon qilmaslik holatlari mavjud.
Majlisda yer munosabatlariga oid sohaga oid qonunchilik ijrosini taʼminlash holatiga ham to‘xtalib o‘tildi. Axborotda aholi va jamoatchilik eʼtirozlariga sabab bo‘layotgan, yer bilan bog‘liq bo‘lgan korrupsiya holatlariga chek qo‘yish maqsadida Bosh prokuratura bilan doimiy hamkorlik ishlari tashkil etilgani taʼkidlab o‘tildi.
Xususan, 2021 yil yanvar oyidan 1 dekabrgacha respublikada 10 042 gektar qishloq xo‘jaligi yerlarini talon-toroj qilish bilan bog‘liq 437 ta jinoyat sodir qilinganligi huquqni muhofaza qiluvchi organlar tomonidan aniqlanib, aybdor shaxslarning javobgarlik masalasi qatʼiy hal qilingan.
Shuningdek, 233 ta holatda mansabdor shaxslar va boshqa yer egalari 5904 gektar yer maydonini firibgarlik yo‘li bilan 75,5 mln AQSH dollariga sotayotgan vaqtida jinoyat ustida qo‘lga olingan. Yoki 76 ta holatda 3110 gektar yerdan noqonuniy foydalanilganlik oqibatida davlat va jamoat manfaatlariga qariyb 1409 mlrd so‘mlik zarar yetkazilganligi fosh etilgan.
Shuningdek, senatorlar muhokama jarayonida davlat organlarining ochiqligini taʼminlash, jamoatchilik nazoratini samarali amalga oshirish har qachongidan ham muhimligini taʼkidladi.
Bu borada ochiqlik o‘z natijasini berayotgani, tizim yopiq bo‘lmasdan, qanchalik ochiq va shaffof bo‘lsa, mansabdor shaxslarning jamoatchilik oldida hisobdorlik hissi, qaror qabul qilish jarayonida masʼuliyati oshishi taʼkidlandi.
Demak, bugungi islohotlar jamoatchilik davlat organining nafaqat amalga oshirayotgan ishlarini, balki kelgusidagi rejalarini ham bilishi va nazorat qilib borishi Muhokamalar jarayonida bildirilgan taklif va tavsilarni inobatga olgan holda Qo‘mitaning tegishli qarori qabul qilindi.
