🔰Yer umummilliy boylik. Shu bois, keyingi yillarda mamlakatimizda yerlardan oqilona va maqsadli foydalanish, yerlarni muhofaza qilish, uni samarali ishlatish borasida keng ko‘lamli islohotlar amalga oshirilmoqda.
🔹Xususan, davlatimiz rahbarining sohaga oid qaror va farmonlari asosida Davlat soliq qo‘mitasi huzuridagi Kadastr agentligi faoliyati zamon talablariga mos ravishda takomillashtirilmoqda. Bunda zamonaviy axborot texnologiyalaridan foydalanish, maʼlumotlarning aniqligi va shaffofligini taʼminlash, mulkka bo‘lgan huquqlarni davlat ro‘yxatidan o‘tkazish tizimini soddalashtirish kabi qator vazifalar doirasida ish olib borilmoqda.
2022 yil 21 aprel kuni Oliy Majlis Qonunchilik palatasi deputatlari Davlat soliq qo‘mitasi huzuridagi Kadastr agentligining Davlat kadastrlari palatasiga tashrifi doirasida ayni yuqorida taʼkidlangan vazifalar doirasida olib borilayotgan ishlar bilan tanishdilar.
Taʼkidlanganidek, sohada olib borilayotgan izchil islohotlar natijasida ko‘chmas mulkka bo‘lgan huquqlarni davlat ro‘yxatidan o‘tkazish, tarmoqda yagona davlat siyosatining amalga oshirilishini taʼminlash, davlat yer kadastri, binolar va inshootlar davlat kadastrini yuritish va yer uchastkalarining o‘zboshimchalik bilan egallab olinishiga yo‘l qo‘ymaslikka qaratilgan samarali yer nazoratini amalga oshirish borasida tizim yaratildi.
Deputatlar tashrif davomida olib borilayotgan ishlar holati, sohada yaratilgan qulayliklar, maʼlumotlarni ishlash, qayta ishlash va tahlil qilish tartibi bo‘yicha olib borilayotgan ishlar bilan yaqindan tanishdilar.
Qayd etish joiz, yaqinda “Ko‘chmas mulkka bo‘lgan huquqlarni davlat ro‘yxatidan o‘tkazish to‘g‘risida”gi qonun loyihasi Oliy Majlis Qonunchilik palatasida birinchi o‘qishda qabul qilindi. Bugungi kunda qonun loyihasi Agrar va suv xo‘jaligi masalalari qo‘mitasi tomonidan ikkinchi o‘qishga tayyorlanmoqda. Deputatlar tashrif davomida ushbu qonun loyihasining amaliyot bilan uyg‘unligini o‘rganishga alohida eʼtibor qaratishdi.
Taʼkidlanganidek, mazkur qonun loyihasini tayyorlashda ko‘chmas mulkka bo‘lgan huquqlarni davlat ro‘yxatidan o‘tkazish masalalarini tartibga soladigan qonunchilik qoidalari va boshqa qonun hujjatlari o‘rganib chiqilgan. Natijada ko‘chmas mulkka bo‘lgan huquqlarni davlat ro‘yxatidan o‘tkazish sohasidagi meʼyoriy-huquqiy negiz tarqoq ekanligi, har xil kuchga ega bo‘lgan ko‘chmas mulkni ro‘yxatdan o‘tkazish to‘g‘risidagi qoidalarni o‘z ichiga olgan meʼyoriy-huquqiy hujjatlar borligi va bir-biriga zid va o‘zaro mos kelmaydigan meʼyorlar mavjudligi aniqlangan.
Sohani yana-da takomillashtirish maqsadida ishlab chiqilgan qonun loyihasi ko‘chmas mulkka bo‘lgan huquqlarni davlat ro‘yxatidan o‘tkazishdagi mavjud tartibotlar, huquqni belgilovchi hujjatlar, ko‘chmas mulkka bo‘lgan huquqlar davlat reyestri, ro‘yxatdan o‘tkazish ishi va biznes jarayonlarni elektron shaklda axborot tizimlari orqali yuritishga qaratilgan normalar asosida ishlab chiqilgan.
Deputatlar Kadastr agentligida maʼlumotlarni qayta ishlash markazi bilan ham tanishib, sohada zamonaviy axborot kommunikatsiya texnologiyalarining joriy etilganligi va unda ishlash amaliyoti, maʼlumotlarni tezkor qayta ishlash jarayonlalarini ko‘zdan kechirishdi.
Ko‘chmas mulkka bo‘lgan huquqlarni ro‘yxatdan o‘tkazish jarayonlari, ularni maʼlumotlar bazasiga joylashtirish va reyestrdan ro‘yxatga o‘tkazish ishlari ham deputatlarda qiziqish uyg‘otdi. Ayniqsa, Kadastr agentligi tomonidan Jahon banki loyihalari doirasida yaratilayotgan dasturlar va ularni amaliyotga tadbiq etish borasida ko‘rilayotgan chora-tadbirlar taqdimoti savol-javoblarga boy bo‘ldi. Mazkur loyihalarni takomillashtirish bo‘yicha deputatlar tomonidan bir qator takliflar ham berildi.
Deputatlarning soha faoliyati va olib borilayotgan ishlar holati bilan tanishuvi bevosita saylovchilar bilan uchrashuvlarda kadastr sohasi bo‘yicha ko‘tarilgan savollarga javob berishi bilan birga qonun loyihalarini takomillashtirishga ham xizmat qiladi.
Tadbirda qonun loyihasini takomillashtirishga qaratilgan taklif va tavsiyalar ishlab chiqildi.
