Bu haqda viloyat Matbuot uyida Davlat soliq qo‘mitasi huzuridagi Kadastr agentligi hamda Davlat kadastrlari palatasi viloyat boshqarmalari tomonidan 2022-yilning 9 oyi davomida viloyatda kadastr sohasida amalga oshirilgan ishlarga bag‘ishlangan matbuot anjumanida aytildi.
- Yer munosabatlari bilan bog‘liq qonunbuzilish holatlari yuzasidan o‘tkazilgan o‘rganishlarimiz davomida 9 oy davomida viloyatimizda 1413 holatda 443 gektar yer maydonlari o‘zboshimchalik bilan egallab olinganligi va yer qonun buzilish holatlari aniqlandi, - deydi Kadastr agentligi viloyat boshqarmasi boshlig‘i F.Xudoyqulov. – Bu holatlarning asosini fuqarolarning uy-joy qurish maqsadida egallagani tashkil etadi (960 holat). Shundan 329 holatda 125 gektar tomorqa sifatida, 246 holatda 18 gektar noturar joy qurish maqsadida va 207 holatda 204 gektar boshqa holatlarda foydalanish uchun egallab olingan.
Ushbu aniqlangan holatlarni bartaraf etish yuzasidan yer qonun buzilishini sodir etgan shaxslarga ogohlantirish xatlari yuborilib, 464 holatda 241 gektar yer maydoni ixtiyoriy bartaraf etilgan. Belgilangan muddatlarda ixtiyoriy bartaraf etilmagan 887 holat fuqarolik ishlari bo‘yicha sud idoralariga noqonuniy qurilmani buzdirish va yer maydonini asl holatiga keltirish yuzasidan daʼvo arizalar va prokuratura organlariga maʼlumotlar taqdim etilgan.
Shuningdek, matbuot anjumanida Davlat kadastrlari palatasi viloyat boshqarmasi boshlig‘i o‘rinbosari b.Aminov aholi xonadonlarini mahallabay tahlil qilish, avvaldan fuqaroning foydalanishda bo‘lgan yakka tartibdagi uy-joyga egalik qilish huquqini tasdiqlovchi va kadastr hujjatiga ega bo‘lmagan hamda uy-joyga egalik huquqini eʼtirof etishga asos bo‘luvchi hujjatlarni to‘plash bilan birga elektron bazaga kiritish ishlarini tashkil etish bo‘yicha qilinayotgan ishlar haqida maʼlumot berdi.
Taʼkidlanishicha, viloyatimizda jami 583 ming 494 ta davlat ro‘yxatidan o‘tmagan obyektlar aniqlangan. Hozirgacha viloyat davlat kadastrlari palatasi va uning hududiy filiallarida 508 ming 919 ta mavjud arxiv hujjatlari o‘rganib chiqilgan.
Matbuot anjumanida boshqarma boshliqlari va mutaxassislar jurnalistlarning mavzuga oid savollariga atroflicha javob berdi.
