Oliy Majlis Qonunchilik palatasi Agrar va suv xo‘jaligi masalalari qo‘mitasi tomonidan yurtimizda yer munosabatlari sohasida amalga oshirilayotgan islohotlar natijalarini keng jamoatchilikka tanishtirish hamda Butunjahon tuproq kuni munosabati bilan “Yer islohotlarining ilk natijalari va istiqbollari” mavzusida respublika ilmiy-amaliy konferensiya o‘tkazildi.
Unda Qonunchilik palatasi deputatlari, Qishloq xo‘jaligi, Iqtisodiy taraqqiyot va kambag‘allikni qisqartirish vazirliklari, Davlat soliq qo‘mitasi huzuridagi Kadastr agentligi mutaxassislari, Toshkent irrigatsiya va qishloq xo‘jaligini mexanizatsiyalash muhandislari instituti olimlari hamda jurnalistlar ishtirok etishdi.
Taʼkidlanganidek, keyingi yillarda yurtimizda Prezidentimiz Shavkat Mirziyoyev rahbarligida yerlarni muhofaza qilish, yer egalarining mulkiy huquqlarini kafolatlash, yer uchastkalarini ajratishning barcha uchun teng, shaffof va bozor tamoyillariga asoslangan tartibini joriy etish, yerga oid mulkiy va huquqiy munosabatlarda barqarorlikni taʼminlashga qaratilgan keng ko‘lamli islohotlar amalga oshirilmoqda. Natijada, qishloq xo‘jaligi yerlari bilan bog‘liq munosabatlarning barqarorligi taʼminlanib, ularning davlat tomonidan monitoringini olib borish, qishloq xo‘jaligi yerlaridan foydalanish va uni muhofaza qilish tizimi tubdan takomillashtirildi.
Shuningdek, yerlardan oqilona, maqsadli foydalanishni taʼminlash borasida Prezidentimizning bir qator farmon va qarorlari, xususan, “Yer munosabatlarida tenglik va shaffoflikni taʼminlash, yerga bo‘lgan huquqlarni ishonchli himoya qilish va ularni bozor aktiviga aylantirish chora-tadbirlari to‘g‘risida”gi Farmoni qabul qilindi. Mazkur hujjat bilan 2021 yil 1 avgustdan boshlab, yer uchastkalari xususiy sektorga – mulk va ijara huquqi asosida, davlat organlari, muassasalari, korxonalari, fuqarolarning o‘zini o‘zi boshqarish organlariga doimiy foydalanish huquqi asosida ajratilishi belgilab berildi.
Konferensiyada mutaxassis va olimlar tomonidan sohada olib borilgan ishlar yuzasidan taqdimotlar qilindi.
Qayd etilganidek, sohani raqamlashtirish borasida qator amaliy ishlar bajarildi. Xususan, Jahon banki bilan hamkorlikda axborot tizimlari hamda 7,5 mln.ta ko‘chmas mulk obyektlarining arxiv hujjatlari raqamlashtirildi. Yer va bino inshootlarini hisobga olish bo‘yicha 2021 yil 1 noyabr holatida 7954,8 ming obyekt hisobga olindi.
Tadbirda qishloq xo‘jaligi yerlarida amalga oshirilgan islohotlar tahlili, yer munosabatlarini tartibga solish bo‘yicha islohotlar samaradorligi, yer va kadastr tizimlarini takomillashtirish bo‘yicha amalga oshirilayotgan ishlar, respublika tuproqlari holati va unumdorligi hamda yer islohotini barqaror iqtisodiy o‘sish ehtiyojlariga mos tarzda rivojlantirishning ustuvor yo‘nalishlari bo‘yicha mavzular atroflicha muhokama qilindi.
Muhokamalarda sohada amalga oshirilgan keng qamrovli ishlar aniq hayotiy misollar bilan ko‘rsatib berildi.
Konferensiya doirasida qishloq xo‘jaligi sohasida qo‘llaniladigan uchuvchisiz uchish apparatlari (dronlar) ko‘rgazmasi ham namoyish qilindi.
