Bugungi kunda sug‘orilmaydigan yaylov yer maydonlaridan samarali foydalanish maqsadida davlat o‘rmon fondi toifasiga kiritilgan yerlar tuman zaxirasiga qaytarilmoqda. Jumladan, Vazirlar Mahkamasining 2022 yil 19-apreldagi “Navoiy viloyatining Xatirchi va Qiziltepa tumanlari hududidagi yer uchastkalarining yer fondi toifasini o‘zgartirish to‘g‘risida” gi qaroriga asosan 105 gektar yer maydoni zaxiraga qaytarildi. Davlat kadastrlari palatasi Navoiy viloyati boshqarmasi boshlig‘i Mansur Nosirov O‘zA muxbiriga sohada amalga oshirilayotgan ishlar haqida quyidagilarni gapirib berdi.
– Qarorga ko‘ra, Xatirchi tumanining Oltinsoy massivi hududidagi Xatirchi davlat o‘rmon xo‘jaligiga qarashli 15 gektar, Qiziltepa tumanidagi “To‘dako‘l” suv ombori atrofida joylashgan Navoiy davlat o‘rmon xo‘jaligiga qarashli 90 gektar jami 105 gektar o‘rmon fondi toifasiga kiritilgan sug‘orilmaydigan yaylov yer maydonlari tumanlar zaxirasiga qaytarildi.
Zaxiraga qaytarilgan yer maydonlari Davlat kadastrlari palatasi Navoiy viloyati boshqarmasi tomonidan “Uzkad” dasturiga chizilib, davlat ro‘yxatidan o‘tkazildi. Endilikda yer maydonlaridan sanoat, transport, aloqa, mudofaa va boshqa maqsadlarda foydalanish mumkin bo‘ladi.
Joriy yilning 1 noyabr holatiga ko‘ra, viloyatda qishloq xo‘jaligiga mo‘ljallangan 132,1 ming gektar qishloq xo‘jaligiga mo‘ljallangan yer maydonlaridan 1906 gektar yer maydoni tuman zaxiralariga qaytarilgan bo‘lib, Davlat kadastrlari palatasi Navoiy viloyati boshqarmasi tomonidan “Uzkad” dasturiga chizilgan va davlat ro‘yxatidan o‘tkazilgan.
Bugungi kunda Davlat kadastrlari palatasi tomonidan 8 ta davlat xizmatlari ko‘rsatilib, ko‘rsatadigan xizmatlar uchun murojaatlar Davlat xizmatlari markazlari hamda Yagona interaktiv davlat xizmatlari portali (my.gov.uz) orqali amalga oshirilmoqda.
Joriy yilning 10 oyi mobaynida Davlat kadastrlari palatasi Navoiy viloyati boshqarmasi va uning hududiy filiallari tomonidan 576 ta kadastr syomka ishlari amalga oshirildi. 2 ming 899 ta yakka tartibdagi uy-joylar, 3 ming 975 ta kvartiralar, 1 ming 265 ta noturar joy ob’ektlarining kadastr hujjatlari rasmiylashtirildi. Noturar joy ob’ektlariga mo‘ljallangan yer uchastkalarining 347 tasiga yer kadastr hujjatlari rasmiylashtirildi.
Shuningdek, jismoniy va yuridik shaxslarga tegishli bo‘lgan jami 26 ming 330 ta turar va noturar joy ob’ektlari, 64 ta ijara huquqi, 2 ming 858 ta bino va inshootlarning ipoteka shartnomalari davlat ro‘yxatidan o‘tkazildi. Nomida turar-joy borligi (yo‘qligi) haqida 109 so‘rovnomaga javob berildi.
Navoiy viloyatida jami 270 mingdan ortiq ko‘chmas mulk ob’ektlari mavjud bo‘lib, joriy yilning 9 oyi davomida 4 ming 149 ta yangi ko‘chmas mulk ob’ektlariga manzil berildi. 2 ming 945 ta 299,8 gektar bo‘sh yer uchastkalariga tegishli tartibda xulosalar berildi. 55 mingdan ortiq xonadonlarda xatlov o‘tkazilib, ma’lumotlar bazasi shakllantirildi.
