Kadastr agentligi Andijon viloyati boshqarmasi, uning tuman, shahar bo‘limlari tomonidan kadastr sohasiga oid qonun, farmon va qarorlar ijrosini ta’minlash, tizimda olib borilayotgan ishlar samaradorligini oshirish, yerlarning hisobini yuritish borasida muayyan ishlar amalga oshirilmoqda.

Prezidentimizning joriy yil 21 fevraldagi "Yer uchastkalaridan foydalanishda davlat nazorati samaradorligini oshirish chora-tadbirlari to‘g‘risida" gi qarori ijrosi doirasida Davlat kadastrlari palatasi Andijon viloyati boshqarmasi mutaxassislari hamda Andijon viloyati Avtomobil yo‘llari hududiy bosh boshqarmasi mas’ul xodimlari hamkorligida xalqaro ahamiyatga molik avtomobil yo‘llari belgilangan tartibda maxsus elektron platforma orqali davlat ro‘yxatidan o‘tkazilmoqda.

– Viloyatdagi xalqaro avtomobil yo‘llarning kadastr hujjatlari tayyorlanayotganligi sohadagi ishlarni yanada yuqori bosqichga ko‘tarishga xizmat qiladi, – deydi Davlat kadastrlari palatasi Andijon viloyati boshqarmasi bosh mutaxassisi Davronbek Mo‘ydinov. – Umuman, joriy yil davomida viloyatdagi barcha xalqaro yo‘llar ro‘yxatdan o‘tkazilib, ularning kadastr hujjatlari tayyorlanishi belgilangan. 

Bugungi kunga qadar xalqaro ahamiyat ega M-41 avtomobil yo‘lining Xonobod shahridan o‘tgan 9 kilometr qismi davlat ro‘yxatidan o‘tkazildi. Shuningdek, A-373 Toshkent – O‘sh xalqaro avtomobil yo‘lining Shahrixon, Asaka, Oltinko‘l, Andijon hamda Xo‘jaobod tumanlaridan o‘tgan 90 kilometr qismidan 51 kilometri tegishli tartibda xatlovdan o‘tkazilib, kadastr pasportlari tayyorlandi. Hozirda mazkur jarayon davom etmoqda.