Bu haqda Davlat Soliq qo‘mitasi huzuridagi Kadastr agentligi Samarqand viloyati boshqarmasining 2022 yil birinchi yarim yillikdagi faoliyati yuzasidan o‘tkazilgan matbuot anjumanida maʼlum qilindi.

Boshqarma maʼmuriy amaliyot bo‘limi boshlig‘i G‘ayrat Avazovning taʼkidlashicha, yilning birinchi yarimida viloyat bo‘yicha yer bilan bog‘liq 1529 ta qonun buzilish holati aniqlanib, 123 ta holat yuzasidan maʼmuriy chora ko‘rish uchun jinoyat ishlari bo‘yicha sudlar va boshqa vakolatli organlarga murojaat qilingan. 389 ta holatda maʼmuriy ishlar tugatilgan va 954 holat bo‘yicha maʼmuriy bayonnomalar rasmiylashtirilgan. Mazkur holatlar bo‘yicha 12 milliard 556 million so‘m jarima qo‘llanilgan.  

Shuningdek, Prezidentimizning 2021 yil 8 iyundagi “Yer munosabatlarida tenglik va shaffoflikni taʼminlash, yerga bo‘lgan huquqlarni ishonchli himoya qilish va ularni bozor aktiviga aylantirish chora-tadbirlari to‘g‘risida” gi farmoni ijrosini taʼminlash yuzasidan o‘tkazilgan o‘rganishlarda 1127 ta holatda 363 gektar yer maydoni o‘zboshimchalik bilan egallab olinganligi va yer qonun buzilishiga yo‘l qo‘yilganligi kuzatildi.  

– Jumladan, 759 ta holatda 159 gektar yer uy-joy qurish maqsadida egallab olingan – deydi G‘.Avazov. – Aniqlangan holatlarni bartaraf etish yuzasidan fuqarolar ogohlantirildi va 212 gektar yer maydoni fuqarolar tomonidan ixtiyoriy bo‘shatildi. Belgilangan muddatlarda ixtiyoriy bo‘shatib berilmagan 148 gektar yer maydonlari bo‘yicha noqonuniy qurilmalarni buzdirish va yer maydonini asl holatiga keltirish yuzasidan fuqarolik ishlari bo‘yicha sud idoralariga daʼvo arizalari va prokuratura organlariga maʼlumotlar taqdim etilgan.  

Matbuot anjumanida O‘zbekiston Respublikasi Prezidentining 2022 yil 21 fevraldagi “Yer uchastkalaridan foydalanishda davlat nazorati samaradorligini oshirish chora-tadbirlari to‘g‘risida” gi qarori ijrosi yuzasidan amalga oshirilayotgan ishlar haqida maʼlumot berildi.