Dunyoning eng rivojlangan davlatlari tajribasidan kelib chiqib aytish mumkinki, ijtimoiy-iqtisodiy taraqqiyotda huquqiy madaniyat hal qiluvchi rol o‘ynaydi. Binobarin, qayerdaki insonlar o‘z haq-huquqlarini bilmas ekan, shu yerda qonun va qonunosti hujjatlari ijrosi oqsayveradi. Eng yomoni, inson manfaatlari cheklanadi.
Afsuski, respublikamizda ham bu borada muammolar yo‘q emas. Oddiy misol, mamlakatimiz bo‘ylab 2 mln 600 ming aholi xonadonlari kadastr hujjatiga ega emas. Davlatimiz rahbari boshchiligida joriy yilning 18 iyul kuni o‘tkazilgan yig‘ilishda bu haqidagi muammolar tilga olinib, oqibatda aholi tomorqa uchun kredit, subsidiya hamda uy-joyini kengaytirishga ipotekadan foydalana olmayotgani aytib o‘tildi. Mavjud holatning salbiy jihatlaridan biri bu kabi uylar uchun yer solig‘i 3 karra ko‘p miqdorda hisoblanayotganidir.
Andijon viloyatida ham bu borada amalga oshirilishi lozim bo‘lgan eng ustuvor vazifalar yuzasidan zarur choralar ko‘rilmoqda. Jumladan, viloyatdagi mavjud xonadonlarda xatlov ishlari uchun 133 nafar kadastr muhandisi jalb qilinib, kunlik xatlov natijalarini umumlashtirish va xatlov jarayonida yuzaga kelgan muammolarni tezkorlik bilan hal qilish maqsadida Davlat kadastrlari palatasi Andijon viloyati boshqarmasida shtab faoliyati yo‘lga qo‘yildi. Natijada shu kungacha viloyatdagi 250 mingdan ziyod aholi turar-joylarining kadastr hujjatlari mavjud emasligi aniqlandi.
— Bundan besh yil muqaddam Andijon tumanidagi Hakan qishlog‘idan hovli-joy sotib olgandim, — deydi “Qum ko‘cha” MFYda istiqomat qiluvchi Husanboy Salimov. — Uy egasining kommunal to‘lovlardan qarzi borligi uchun uyni nomimga o‘tkazishda muammolar kelib chiqdi. Bu esa kadastr hujjatlarini o‘z vaqtida tayyorlash imkonini bermadi. Masʼul idoralar vakillari tomonidan olib borilgan suhbatdan so‘ng huquqiy va amaliy ko‘mak ko‘rsatildi.
Ayni paytda kadastr hujjati mavjud bo‘lmagan turar-joylarning elektron ro‘yxatlarini shakllantirish ishlari davom etmoqda. Buning uchun mahallabay asosida ish tashkil etish o‘z samarasini berayotir.
Dilshodbek AKBAROV,
Davlat kadastrlari palatasi Andijon viloyati
boshqarmasi boshlig‘i.
