Kadastr agentligi Buxoro viloyati boshqarmasi, uning tuman, shahar bo‘limlari tomonidan yer uchastkalarini o‘zboshimchalik bilan egallash, ko‘chmas mulkka bo‘lgan huquqlarning davlat ro‘yxatidan o‘tkazilmaslik holatlarini aniqlash, yerdan maqsadli foydalanilish ustidan davlat nazoratini amalga oshirish borasida keng ko‘lamli ishlar amalga oshirilmoqda.
Viloyatda yerdan foydalanish va uni muhofaza qilish, ayniqsa, qishloq xo‘jaligi yerlaridan oqilona hamda samarali foydalanishga alohida e’tibor qaratilmoqda. Biroq, gurunch kurmaksiz bo‘lmaganidek, fuqarolar tomonidan yerdan noqonuniy foydalanish holatlari ham kuzatilmoqda.
–O‘tkazilgan xatlovlar natijasida joriy yilning birinchi yarim yilligida 508 ta holatda 37,67 gektar yer maydonidan noqonuniy foydalanilayotganligi aniqlandi, – deydi Kadastr agentligi Buxoro viloyati boshqarmasi yer va kadastr nazorati bo‘limi boshlig‘i Abdukarim Toyirov. – O‘zboshimchalik bilan egallab olinganligi tahlil qilinganda, yer maydonlarining 20,65 gektarini qishloq xo‘jaligiga mo‘ljallangan, 16,64 gektar qismini aholi punkti, qolgan qismini suv fondi, zaxira hamda sanoat, transport, aloqa va boshqa yo‘nalishlardagi yerlar tashkil etadi. Yerga oid qonun buzilish holatlarining 118 tasi hududiy kadastr inspektorlari tomonidan olib borilgan tushuntirish-targ‘ibot ishlari natijasida ixtiyoriy bartaraf etilgan. Bundan tashqari, 24 ta holatdagi o‘zboshimchalik bilan egallab olingan yerlarni rasmiylashtirish bo‘yicha prokuraturaga, 316 ta qonun buzilish holatini bartaraf etish maqsadida sud idoralariga da’vo arizalari kiritilgan.
Bundan tashqari, boshqarma tizimida faoliyat yuritib kelayotgan inspektorlar tomonidan o‘tgan davr oralig‘ida yer va kadastr sohasidagi huquqbuzarliklar uchun 1 ming 365 ta holatda fuqarolarga nisbatan 4,06 milliard so‘m miqdorida ma’muriy jarimalar qo‘llangan. O‘rganishlar shuni ko‘rsatadiki, ma’muriy jarimalarning aksar qismi ko‘chmas mulkka bo‘lgan huquqni davlat ro‘yxatidan o‘tkazish uchun o‘z vaqtida murojaat etmaslik holati bo‘yicha aniqlangan. Olib borilayotgan targ‘ibot ishlariga qaramasdan fuqarolar tomonidan yer tuzish loyihalaridan o‘zboshimchalik bilan chetga chiqish va yerlarni o‘zboshimchalik bilan egallab olish holatlari hamon uchramoqda.
Kadastr agentligi viloyat boshqarmasi mutasaddilarning ma’lum qilishicha, yerdan foydalanish bo‘yicha o‘rganishlar davom etmoqda.
