Joriy yilning dekabr oyi 1-2-dekadasida O‘zbekiston Prezidenti Administratsiyasi, Bosh prokuratura, Adliya vazirligi, Davlat soliq qo‘mitasi, Kadastr agentligi vakillaridan iborat O‘zbekiston delegatsiyasining bir qator Yevropa davlatlariga institutsional o‘rganish va tajriba almashish tashrifi bo‘lib o‘tdi.
Kadastr agentligi direktori Farrux Pulatov boshchiligidagi delegatsiya 12-15 dekabr kunlari yer va ko‘chmas mulk kadastri sohasidagi ilg‘or xorijiy tajribani o‘rganish maqsadida Italiya Daromadlar agentligiga tashrif buyurdi.
Tashrif kun tartibidan:
- ko‘chmas mulkka bo‘lgan huquqlarni davlat ro‘yxatidan o‘tkazish, davlat kadastrlarini yuritish, davlat xizmatlari ko‘rsatish bo‘yicha tajriba o‘rganish;
- yer nazorati, o‘zboshimchalik bilan qurilgan imoratlarga bo‘lgan huquqlarni eʼtirof etish bo‘yicha Italiyada amalga oshirilgan loyihalarni o‘rganish;
- yer maʼmuriyatchiligiga oid axborot tizimlari va geoportal imkoniyatlari bilan tanishish masalalari o‘rin oldi.
Bo‘lib o‘tgan uchrashuvlarda Italiya kadastr tizimidagi turli yo‘nalishlar bo‘yicha 10 dan ortiq taqdimotlar o‘tkazildi.
Maʼlumot o‘rnida: Italiya Iqtisodiyot va moliya vazirligi huzuridagi Daromadlar agentligi 3 ta institutsional organdan iborat: Bosh direktor, Boshqaruv qo‘mitasi va Auditorlar kengashi. Markaziy darajada Daromadlar agentligi 3 ta direktorat, 13 ta departamentga bo‘lingan bo‘lib, jami 33 000dan ortiq xodim ishlaydi.
Mahalliy darajada 21 ta hududiy va 128 ta provinsial boshqarmalari mavjud.
Shuningdek, Kadastr agentligi rahbari tomonidan O‘zbekistonda yer va unga bog‘liq resurslarning hisobini yuritish, ulardan oqilona foydalanishni takomillashtirish borasida tizimdagi tub islohotlar to‘g‘risida to‘xtalib o‘tildi. Italiya tomoniga mamlakatda sohada amalga oshirilayotgan ishlar va erishilgan natijalar bo‘yicha taqdimot o‘tkazildi.
Ikki davlat Agentliklari o‘rtasida kadastr, kartografiya va yerni ro‘yxatga olish xizmatlari borasida o‘zaro tajriba almashish masalalari bilan birgalikda, Italiya Daromadlar agentligiga O‘zbekistonning Italiyadagi elchixonasi masʼullari tomonidan 2022-2026 yillarga mo‘ljallangan Yangi O‘zbekiston taraqqiyot strategiyasi va O‘zbekiston-Italiya ikki tomonlama aloqalarga bag‘ishlangan italyan tilida chop etilgan kitoblar taqdim etildi.
Tashrif yakuniga ko‘ra, idoralararo o‘zaro aloqalarni yana-da rivojlantirish maqsadida “mavzuli o‘rganish”lar bo‘yicha hamkorlikni davom ettirishga kelishildi.
Shuningdek, Agentlik direktori o‘rinbosari Mirsaid Mirmaksudov boshchiligidagi ishchi guruh Serbiyaning Belgrad shahrida bo‘lib qaytdi.
Tashrif davomida:
Serbiyaning Respublika geodeziya muassasasi faoliyati bilan tanishuv;
Ko‘chmas mulk kadastri sektori faoliyati;
Ko‘chmas mulk kadastri axborot tizimi (ISREC);
Ko‘chmas mulklarni ommaviy baholash tizimi;
GEOSERBIA onlayn milliy geoportali;
Yer qonunchiligiga rioya etilishini nazorat qilish;
Hujjatsiz qurilgan ko‘chmas mulk obyektlarga bo‘lgan huquqlarni eʼtirof etish ishlari bilan tanishildi.
Maʼlumot o‘rnida: Respublika geodeziya muassasasi (Republic geodetic authority) ko‘chmas mulk kadastri, geodeziya ishlari, manzillar reyestri, ko‘chmas mulkni baholash va fazoviy maʼlumotlar milliy infratuzilmasini yuritish bo‘yicha maxsus muassasa hisoblanib, 1992 yilda tashkil etilgan. Tashkilotda jami 3 000 dan ortiq mutaxassislar (markaziy apparatda 80 dan ortiq) faoliyat yuritadi, 9 ta hududiy va 53 ta tuman miqyosidagi filiallari mavjud.
O‘zbekiston delegatsiyasi Serbiya Respublika geodeziya idorasi rahbari Borko Drashkovich bilan uchrashuv o‘tkazish bilan birga, Serbiya Respublikasi Adliya vazirining o‘rinbosari Elena Deretich bilan uchrashuvlar o‘tkazdi. Uchrashuvda Serbiya tomoni hujjatsiz qurilgan ko‘chmas mulk obyektlariga bo‘lgan huquqlarni eʼtirof etish bo‘yicha o‘z ekspertlik fikrlari bilan bo‘lishdi.
Maʼlumot o‘rnida: Mazkur tashrif yerga bo‘lgan huquqlarni ishonchli himoya qilish va undan samarali foydalanish, yer boshqaruvi va kadastr tizimlari borasida xorij tajribasini o‘rganish maqsadida, Kadastr agentligi tashabbusi va Tashqi ishlar vazirligi ko‘magida amalga oshirildi.
