Bu haqda AOKAda Kadastr agentligi axborot xizmati rahbari Neʼmat Atamurodov ishtirokida o‘tkazilgan brifingda maʼlum qilindi.
Yer qonun buzulish holatlarini aniqlash va chora ko‘rish yo‘nalishida Davlat soliq qo‘mitasi huzuridagi Kadastr agentligining yer va kadastr nazoratchilari tomonidan o‘tgan 2021 yil hamda joriy yilning 1 martiga qadar quyidagilar amalga oshirildi.
Yer nazoratini amalga oshirish bo‘yicha olib borilgan yer va kadastr nazorati tadbirlari natijasida jami 19 162 ta holatda 3 866 gektar (shundan 2022 yil 1 martgacha 2 269 ta 1 324 gektar) yerlarni o‘zboshimchalik bilan egallab olish yuzasidan huquqbuzarliklar aniqlandi.
Shundan, kadastr idoralari tomonidan berilgan yozma ko‘rsatmalar asosida 9 682 ta holatda 1 699 gektar (2022 yilda 653 ta 369 gektar) yoki 51 foiz yer qonunbuzilish holatlari ixtiyoriy ravishda bartaraf etildi.
Ixtiyoriy ravishda bartaraf etilmagan 9 480 ta 2 166 gektar o‘zboshimchalik bilan yegallangan yer uchastkalarini qaytarish va ularda qurilgan imoratlarni buzdirish bo‘yicha sudlarga 7 049 ta holatda 842 gektar (2022 yilda 438 ta 39,7 gektar) daʼvo arizalar kiritildi. Shundan, 1 940 ta (286,7 gektar) daʼvo aʼrizalar sudlar tomonidan qanoatlantirilib, majburiy ijroga qaratildi.
Huquqbuzarlik holatida jinoyat alomatlari mavjud bo‘lgan 1 111 ta (2022 yilda 104 ta) materiallar o‘rnatilgan tartibga muvofiq prokuratura organlariga kiritildi. Huquqbuzarliklarni aniqlash va ko‘rib chiqish bo‘yicha berilgan vakolatlardan samarali foydalanib, 35 581 ta (2022 yilda 5 481 ta) huquqbuzarliklar aniqlandi va maʼmuriy jazo choralari qo‘llanildi.
29 982 ta yer uchastkasiga bo‘lgan huquqlarni davlat ro‘yxatidan o‘tkazish uchun o‘z vaqtida murojaat etmaslikka oid huquqbuzarliklar aniqlanib, ularga nisbatan tegishli maʼmuriy jazo choralari ko‘rildi. 58 nafar mansabdor shaxslar (fermerlar) tomonidan sug‘oriladigan yerlarni o‘zboshimchalik bilan egallab olishga yo‘l qo‘ymaslik bo‘yicha choralar ko‘rilmaganligi yoki yer uchastkasi o‘zboshimchalik bilan egallab olinganligi fakti to‘g‘risida vakolatli organlarni xabardor etmaslik holatlari aniqlanib, huquqbuzarlarga nisbatan tegishli maʼmuriy jazo choralari ko‘rildi.
Yer va kadastr nazoratini avtomatlashtirish, korrupsiya holatlarini oldini olish maqsadida yerga oid huquqbuzarliklarni aniqlashdan bartaraf etilgunga qadar monitoringini yurituvchi “E-yer nazorat” avtomatlashtirilgan axborot tizimi amaliyotga joriy yetilib, 4 422 ta aniqlangan huquqbuzarliklar axborot tizimiga kiritildi.
