Ishonch telefoni : 1097 Kirish

Geodeziya va kartografiya yo‘nalishida xususiy faoliyatni yo‘lga qo‘yishda tadbirkorlik subyektlariga yaratilgan imkoniyatlar

07.07.2022
785

Bugungi kunda mamlakatimiz iqtisodiyotning barcha sohalarida raqamlashtirish va innovatsion axborot-kommunikatsiya texnologiyalaridan foydalanib axborot tizimlari va veb-portallar yaratilmoqda hamda ushbu axborot tizimlari yordamida aholiga va tadbirkorlik subyektlariga davlat xizmatlari va boshqa turdagi xizmatlar ko‘rsatib borilmoqda.

Shuningdek, Vazirlar Mahkamasining 2022 yil 25 fevraldagi 88-sonli qarori bilan tasdiqlangan “Faoliyatni boshlash yoki tugatish uchun vakolatli organni xabardor qilish tartibi to‘g‘risida”gi yagona nizomning 22-ilovasida Geodeziya va kartografiya faoliyati pasportida faoliyat turlari belgilangan.

Ushbu nizomga va pasportda belgilangan talab va shartlarga muvofiq xabardor qiluvchilar o‘z faoliyatini boshlaganlik yoki tugatganlik TO‘G‘RISIDAgi xabarnomani Yagona interaktiv davlat xizmatlari portali (YAIDXP) yoki “Litsenziya” axborot tizimi orqali xabardor qilish tartibida amalga oshiriladigan faoliyatni boshlashdan oldin arizalarini elektron shaklda yuborish yo‘lga qo‘yilgan.

Dasturiy taʼminotlarni ishlab chiqish bilan birgalikda geodeziya va kartografiya faoliyati bilan shug‘ullanuvchi yuridik shaxslarga quyidagi qulayliklar yaratilgan: — tadbirkorlarga geodeziya va kartografiya ishlarini amalga oshirishi uchun, zarur normativ-texnik hujjatlarning mavjud bo‘lish talabi bekor qilinib, Kadastr agentligining veb-sahifasi orqali ochiq foydalanish imkoniyati yaratildi;

— arizani ko‘rib chiqilganligi uchun bazaviy hisoblash miqdorining ikki baravari miqdoridagi yig‘im – yarim baravargacha o‘zgartirildi;

— tasdiqnoma olishga taqdim qilingan hujjatlarni ko‘rib chiqish va rasmiylashtirish ishlari 20 kun davomida bajarilgan bo‘lsa, axborot tizimi orqali onlayn rejimda, yaʼni tizimi orqali hujjat taqdim qilingan kunning o‘zidayoq tasdiqnomani yuklab olish imkoniyati yaratildi.

— tadbirkorlik subyektlarining anʼanaviy usulda hujjatlarni taqdim qilish o‘rniga, inson omillari aralashuvisiz licenses.gov.uz portali orqali ariza topshirilishi imkoniyati yaratilib, hujjatlari idoralararo axborot tizim orqali o‘rganilib, tadbirkorlik subyektlariga tasdiqnoma yuborish amaliyoti yo‘lga qo‘yildi;

— geodeziya va kartografiya yo‘nalishidagi mutaxassisligi bo‘yicha ish malakasiga ega bo‘lish talabi 2 yildan 1 yilgacha qisqartirildi; — xodimlarning maʼlumotiga oid talablar geodeziya, kartografiya, kadastr, geoinformatika, kompyuter injiniring, yerni masofadan zondlash, yer tuzuvchi muhandisi kabi mutaxassislik yo‘nalishlari bilan kengaytirishga imkoniyatlar yaratildi.

“Litsenziya” axborot tizimi ishlab chiqilishi bilan barcha geodeziya va kartografiya faoliyati bilan shug‘ullanuvchi yuridik shaxslar faoliyatini boshlaganlik yoki tugatganligi uchun yuborilgan arizalarni ko‘rib chiqishda inson omili aralashuvisiz avtomatlashtirildi.