Qashqadaryo viloyatida 2022 yilning o‘tgan yetti oyi davomida Davlat kadastrlari palatasi viloyat boshqarmasi va uning filiallari tomonidan 25 ming nafar kishiga tegishli yer uchastkasi va ko‘chmas mulkka kadastr pasporti berilgan. Bu haqda “Daryo”ga Davlat kadastrlari palatasi viloyat boshqarmasi axborot xizmati rahbari Namoz Choriyev maʼlum qildi.

Qayd etilishicha, bundan tashqari 2500 ta yuridik tashkilotga tegishli yer uchastkalari va ko‘chmas mulklarga ham kadastr pasporti tayyorlab berilgan.

«Shuningdek, viloyatda 28,6 mingta yer uchastkasi va ko‘chmas mulkka bo‘lgan huquqlar hamda tuzilgan bitimlar, 3,3 mingta qurilishi yakunlangan bino va inshootni foydalanishga qabul qilish haqidagi dalolatnomalar davlat ro‘yxatidan o‘tkazilgan. Tadbirkorlik maqsadlari uchun viloyatda 2193 ta yer uchastkasi ochiq elektron onlayn auksion savdolariga qo‘yilgan», — deydi boshqarma axborot xizmati rahbari Namoz Choriyev.

Shuningdek, qishloq xo‘jaligi maqsadlarida dehqon xo‘jaligi tashkil etish uchun onlayn elektron tanlov orqali kelgan 16,3 ming ta lot davlat ro‘yxatidan o‘tkazilgan.

«Bugungi kunda Qashqadaryo viloytida 2 million 321 ming 391 gektar qishloq xo‘jaligi yeri mavjud. Viloyatda faoliyat olib borayotgan kadastr xodimlari tomonidan ayni kungacha 2 million gektarga yaqin qishloq xo‘jaligi yer maydonlariga oid maʼlumotlar kadastr axborot tizimida hisobga olingan. Shuningdek, mazkur axborot tizimiga viloyatdagi ko‘p qavatli uylar haqidagi maʼlumotlarni kiritish ishlari davom etmoqda. Bugunga kelib, viloyatdagi 2 ming 257 ta ko‘p qavatli turarjoyning 1293 tasi tizimga muvaffaqiyatli kiritilgan», — deydi boshqarma axborot xizmati masʼuli.

Qo‘shimcha qilinishicha, joriy yilning o‘tgan davri mobaynida boshqarma tomonidan 15 ming 998 ta turar joy, 8021 ta noturar joy va 4 630 ta ko‘p qavatli turar-joy jami 28 649 ta ko‘chmas mulkka bo‘lgan huquqlar davlat ro‘yxatidan o‘tkazilgan.