Qonunbuzarlik holatlari toʻgʻrisida maʼlumot bergan shaxslar, ularning bergan maʼlumotlari asosida huquqbuzardan undirilgan jarima hisobidan pul mukofoti bilan ragʻbatlantiriladi.
Iqtisodiy sohadagi keng koʻlamli oʻzgarishlar yer va unga bogʻliq resurslarning aniq hisobini yuritish, ulardan oqilona foydalanish tizimini yanada takomillashtirishni talab etmoqda.
Bu boʻyicha Vazirlar Mahkamasining 14.04.2022-yilgi 183-sonli qarori Davlat yer va kadastr nazoratini amalga oshirish tartibi toʻgʻrisidagi nizomga muvofiq “Yerga oid huquqbuzarliklarni aniqlashda jamoatchilik nazorati va jamoatchilik nazorati subyektlarini ragʻbatlantirishning” quyidagi tartiblari belgilangan.
– Jamoatchilik nazorati subyektlari yerlardan foydalanish hamda ularni muhofaza qilish ustidan jamoatchilik nazoratini oʻz vakolatlari doirasida amalga oshiradilar.
– Jamoatchilik nazorati subyektlari maxsus vakolatli davlat organiga yerga oid huquqbuzarliklar toʻgʻrisida fotosuratlar, videoyozuvlarni ilova qilgan holda axborot tizimi orqali arizalar va shikoyatlar bilan murojaat qilishi mumkin.
– Yerlarni oʻzboshimchalik bilan egallab olish holatlari toʻgʻrisida maʼlumot bergan shaxslar, ularning bergan maʼlumotlari asosida huquqbuzardan undirilgan jarima hisobidan mazkur Nizomning 2-ilovagasiga muvofiq bazaviy hisoblash miqdorining oʻn foizi miqdoridagi pul mukofoti bilan ragʻbatlantiriladi.
Jamoatchilik nazorati subyektlari tomonidan maxsus vakolatli davlat organiga taqdim qilingan yerga oid huquqbuzarliklar toʻgʻrisidagi videoyozuvlarda sodir etilgan huquqbuzarlik holati, huquqbuzar shaxs toʻgʻrisidagi maʼlumotlar aniq aks ettirilishi hamda quyidagi talablarga mos boʻlishi kerak.
– videofaylning namoyish etish imkoniyati 720x480 pikseldan kam boʻlmasligi,
– videoyozuv davomiyligi 30 sekunddan kam boʻlmasligi va 10 daqiqadan oshmasligi;
– videoyozuv maʼlumotlarida sana va vaqt koʻrsatilishi.
Huquqbuzarlik holati aks ettirilgan videoyozuvlarga har qanday tarzda oʻzgartirishlar kiritish taqiqlanadi. Oʻzgartirish kiritilgan videoyozuvlar koʻrib chiqilmaydi, hajmini qisqartirish maqsadida videoyozuvning bevosita huquqbuzarlik holati aks ettirilgan qismini kesib olish bundan mustasno.
Jamoatchilik nazorati subyektlarini ragʻbatlantirish.
Ragʻbatlantirish huquqbuzardan jarima undirilgandan soʻng fuqaroning uyali telefon raqami hisobiga yoki bank plastik kartasiga, yuridik shaxsning esa bankdagi hisobvaragʻiga maxsus vakolatli davlat organining byudjetdan tashqari jamgʻarmasi hisobvaragʻiga oʻtkazilgan mablagʻlar hisobidan avtomatik tarzda pul oʻtkazish yoʻli bilan amalga oshiriladi.
Huquqbuzarlik holatlari toʻgʻrisidagi maʼlumotlarni taqdim etgan shaxslar toʻgʻrisidagi maʼlumotlarning oshkor etilishiga yoʻl qoʻyilmaydi.
Kadastr agentligi Qoraqalpogʻiston Respublikasi boshqarmasi bosh Yuristkonsulti
Mangitov Palvan
