Kadastr agentligining Buxoro viloyati boshqarmasi va uning hududiy bo‘limlari tomonidan yer qonunbuzilish holatlarini aniqlash hamda oldini olish borasida o‘tkazilgan xatlovlar davomida viloyat bo‘yicha o‘tgan 2021 yil va 2022 yilning yanvar oyi davomida jami 1 ming 170 ta holatda 155,7 gektar yer maydonlari o‘zboshimchalik bilan egallab olinganligi aniqlangan.

– Olib borilgan tushuntirish va targ‘ibot ishlari natijasida 181 ta qonunbuzilishi natijasida o‘zboshimchalik bilan egallangan 23,5 gektar yer maydoni dastlabki holatiga qaytarildi, – deydi Kadastr agentligining Buxoro viloyati boshqarmasi Yer va kadastr nazorati bo‘limi boshlig‘i Abdukarim Toyirov. – Mazkur jarayonlarni bartaraf etish bo‘yicha sudlarga jami 695 ta da’vo arizalari kiritilgan. 

Qolgan 297 ta noqonuniy qurilmalar bo‘yicha ham da’vo arizalari kiritish uchun hujjatlar rasmiylashtirilmoqda. Jumladan, Agentlikning G‘ijduvon tumani bo‘limi tomonidan nazorat tadbirlari o‘tkazilganda tumanning «Paxtaobod» hududidagi «Muazzam Aya Sardori» fermer xo‘jaligiga tegishli 555-konturdagi 50 ball bonitetli ekin yer maydonidan «Ulfatbibi» MFYda yashovchi fuqaro Sherzod Sunnatov tomonidan uy-joy qurish maqsadida o‘zboshimchalik bilan jami 0,138 gektar ekin (sug‘oriladigan) yer maydoni egallanib, 0,0032 gektar qurilish ishlari bajarganligi aniqlangan. 

Ushbu holatda tegishli hujjatlar rasmiylashtirilib, prokuratura organlariga belgilangan tartibda yuborilgan. Bugungi kunda holat bo‘yicha jinoiy ish qo‘zg‘atilgan.  
Kadastr agentligi Buxoro viloyati boshqarmasi hamda uning hududiy bo‘limlari tomonidan o‘zboshimchalik bilan egallangan yer maydonlari va noqonuniy qurilmalarni bartaraf etish borasida muntazam ish olib borilmoqda.