Mamlakatimizda 2022 yil yer hisobi va davlat kadastrlarini shakllantirish, sohaga raqamli texnologiyalarni joriy etish borasida samarali ishlar amalga oshirildi. Xususan, Prezidentimizning 2020 yil 7 sentabrdagi “Yer hisobi va davlat kadastrlarini yuritish tizimini tubdan takomillashtirish chora-tadbirlari to‘g‘risida” farmoniga asosan ko‘plab yangiliklar qatori davlat kadastrlari obyektlarini xatlovdan o‘tkazish va Milliy geoaxborot tizimiga kiritish vazifasi belgilandi.
Dalat kadastrlari palatasi Toshkent viloyati boshqarmasi boshlig‘i Jasur Ahrorov shu kabi masalalarga qanday yechim topilayotgani, o‘tgan yil sarhisobi va kelgusi rejalar haqida O‘zA muxbiriga intervyu berdi.
– Respublikada ilk bor aynan bizning viloyatda tajriba sifatida Bekobod tumani misolida barcha yerdan foydalanuvchilarini 8 ta yer toifasi bo‘yicha hisobga olinib, UzKAD dasturiga kiritilishi ya’ni elektronlashtirish ishlari amaga oshirildi, – deydi Jasur Ahrorov.
– Bundan tashqari, filiallarmizdagi mavjud arxiv ma’lumotlar raqamlashtirildi. Buning natijasida arxiv hujjatlarimiz tartibga keltirildi. Sababi, bizning sohada arxiv bu har qanday ishning bosh negizi demakdir. Fuqarolarning tadbirkorlik faoliyati bilan shug‘ullanishlari uchun auksion savdolariga rejadan ortig‘i bilan yer uchastkalari ajratilishiga erishdik. Natijada hududda ko‘chmas mulk obyektlari soni oshdi.
Yil davomida esa 82 ming 300 ta ko‘chmas mulk obyektlari davlat ro‘yxatidan o‘tkazildi. Bundan tashqari, aholining daromad topishga qaratilgan tadbirkorlik tashabbuslarini moliyaviy qo‘llab-quvvatlash, aholiga agrar tarmoqda o‘z biznesini tashkil etishga ko‘maklashish, qishloq xo‘jaligi mahsulotlarini yetishtirishda dehqon xo‘jaliklarining ulushini oshirish va qishloq xo‘jaligini diversifikatsiyalash orqali oziq-ovqat xavfsizligini ta’minlash maqsadida doimiy ravishda yer uchastkalari ajratilishi yo‘lga qo‘yildi. 2023 yilda oldimizga juda katta maqsadlarimiz bor.
Alohida e’tiborni sohamiz kadrlariga qaratmoqchimiz. Chunki ish sifati to‘g‘ridan to‘g‘ri malakali va bilimli kadrlar va ularga yaratilgan sharoitga borib taqaladi. Ularni o‘qitish va malakasini oshirishda Toshkent irrigatsiya va qishloq xo‘jaligini mexanizatsiyalash muhandislari instituti bilan hakmorlikni yo‘lga qo‘yganmiz va ular orqali kadrlar zaxiramizni shakllantiramiz. Bundan tashqari, viloyat hududidagi barcha yerdan foydlanuvchilarning elektron bazasini yaratib olsak, biz o‘z oldimizga qo‘yilgan maqsadlarga erishdik, deb hisoblay olamiz.
