Yerga egalik qilish va undan toʻgʻri foydalanishning qonuniy asoslari mavjud boʻlsada, amaliyotda buning aksi boʻlgan holatlar hamon uchrab turibdi.
— Hududlarda oʻtkazilayotgan oʻrganishlar jarayonida yerdan noqonuniy foydalanish holatlari koʻplab uchrayotgani bor gap, — deydi Kadastr agentligi Andijon viloyati boshqarmasi boshligʻi oʻrinbosari Botirjon Mirzaahmedov. — Misol uchun, Shahrixon tumanida istiqomat qiluvchi Jasurbek Ibragimovni olaylik. U oʻziga tegishli boʻlmagan yer uchastkalarida noqonuniy tarzda qurilish ishlari bilan shugʻullanib, amaldagi tartiblarga zid xatti-harakatni sodir etgan. Natijada unga nisbatan 40 mln. 500 ming soʻm jarima qoʻllanildi. Baliqchi tumanida yashovchi Abdugʻaffor Samatov esa yer uchastkasini oʻzboshimchalik bilan egallab olgan va undan qonunga zid ravishda foydalanib kelgan. Jalaquduq tumanilik Elyorbek Temirov koʻchmas mulkka nisbatan egalik huquqini davlat roʻyxatidan oʻtkazmagan. Uning bu xatosi tegishli miqdordagi maʼmuriy jarima qoʻllanilishiga sabab boʻldi. Afsuski, bu kabi misollarni yana davom ettirish mumkin. Shunga koʻra boshqarmamiz xodimlari hamkor idoralar bilan birgalikda aholi oʻrtasida ayni mavzuda tushuntirish ishlarini olib bormoqdalar. Zero, maqsadimiz jarima undirish emas, balki fuqarolarda yerga nisbatan huquqiy bilim va madaniyatni shakllantirishdan iborat.
Joriy yilning oʻtgan davrida boshqarma inspektorlari tomonidan jami 2 ming 614 ta holatda maʼmuriy bayonnomalar rasmiylashtirilib, 4 mlrd. 35 mln. soʻm miqdoridagi maʼmuriy jarimalar qoʻllanildi. Ushbu raqamlarning oʻziyoq bu borada joylarda amalga oshirilishi lozim boʻlgan huquqiy targʻibot ishlarini yanada jonlantirish zaruratini koʻrsatadi.
