Tadbirkorlik va shaharsozlik faoliyati uchun 77 042 ta 4 796 gektar bo‘sh turgan yer uchastkasi “Yerelektron” axborot tizimiga kiritilgan. Bu haqda AOKAda o‘tkazilgan brifingda Kadastr agentligi boshqarma boshlig‘i o‘rinbosari Qobil Bobojonov ma’lum qildi.
– Tadbirkorlik va shaharsozlik faoliyatini amalga oshirish uchun qishloq xo‘jaligiga mo‘ljallanmagan bo‘sh turgan yer uchastkalarini mulk va ijara huquqi asosida elektron onlayn-auksion orqali realizatsiya qilish tartibi belgilangan, – deydi Q.Bobojonov. – Qarorga asosan tadbirkorlik va shaharsozlik faoliyati uchun 77 042 ta 4 796 gektar bo‘sh turgan yer uchastkalari “Yerelektron” axborot tizimiga kiritildi. Sohaga oid qonunchilik hujjatlari normalariga shaharsozlik faoliyatini amalga oshirish uchun yer uchastkalarini ajratish imkoni yo‘qligi sababli 8 468 ta 369 gektar yer uchastkalari belgilangan talablarga mos kelmaganligi uchun rad etildi. Shundan tizim orqali 11 ta mas’ul davlat idoralari tomonidan ijobiy xulosa berilib, jami 41 084 ta 2161 gektar auksionga chiqarildi.
Ta’kidlanishicha, auksion savdolariga chiqarilgan yer uchastkalarining 16 580 tasi mulk huquqi asosida, 24 504 tasi esa ijara huquqi tashkil etadi.
Auksion savdolariga chiqarilgan yer uchastkalarining asosiy qismi ya’ni 38 435 ta yer uchastkalari tadbirkorlik faoliyati ishlab chiqarish, savdo, xizmat ko‘rsatish servis obyektlari maqsadlari uchun savdolarga chiqarilgan.
Shuningdek, ko‘p qavatli turar-joy binolarini qurish uchun 608 ta yer uchastkalari auksion savdolari chiqarilgan. Ularning umumiy yer maydoni 40 gektarni tashkil etadi.
Yana bir yo‘nalish, Yangi O‘zbekiston massivlarida (ko‘p qavatli turar-joylar) qurish uchun 65 ta yoki 3 gektardan ortiq yer uchastkalari auksion savdolariga chiqarilgan.
Muhim yo‘nalishlardan yana biri, Yoshlar sanoat zonasi hududida tadbirkorlik subyektlari uchun yer maydonlarini auksion savdolariga chiqarish bo‘lib, bu yo‘nalishda 965 ta, ya’ni 65 gektar yer uchastkalari auksion savdolariga qo‘yildi. Shu bilan birga, 16 686 ta 1 512 gektar maydondagi yer uchastkalari kelishish jarayonida turibdi.
Auksion savdolari orqali 4 485 ta yer uchastkalari sotilgan. Ularning boshlang‘ich narxi 128,1 mlrd so‘mni tashkil etgan bo‘lsa, sotilgan narxi 226 mlrd so‘mni qayd etdi.
Jismoniy va yuridik shaxslar xohishiga ko‘ra, yerelektron.uz ochiq elektron portalida yer uchastkasiga bo‘lgan huquq turini, aniq chegaralari hamda maydoni va rejalashtirilayotgan qurilish obyekti to‘g‘risidagi ma’lumotlarni keyinchalik ularni auksionga qo‘yish masalasini belgilangan tartibda ko‘rib chiqish uchun joylashtirish bo‘yicha takliflar kiritish imkoniyatlari yaratilgan.
M.Qosimova,
O‘zA
