Kadastr agentligining Qashqadaryo viloyati boshqarmasi va uning tuman (shahar) bo‘limlari tomonidan yer uchastkalarini o‘zboshimchalik bilan egallab olish, noqonuniy imorat qurilishiga oid 1 ming 496 ta holatda 1616,6 gektar yer maydonida qonun buzarlik holatlari aniqlangan.

Bu haqida boshqarmaning axborot xizmati bo‘yicha bosh mutaxassisi Namoz Choriev O‘zA ga ma’lum qildi.

Ta’kidlanishicha, mazkur qonun buzilish holatlari: 902 ta holatda 1578,8 gektar qishloq xo‘jaligi yerlarida, 518 ta holatda 32,4 gektar aholi punkti yerlarida, 2 ta holatda 0,4 gektar tarixiy-madaniy ahamiyatga molik yerlarda, 42 ta holatda 3,6 gektar o‘rmon fondi yerlarida, 32 ta holatda 1,3 gektar suv fondi yer toifalarida amalga oshirilgan.

Kadastr xodimlari tomonidan o‘tkazilgan profilaktik tadbirlar natijasida yer qonun buzilish holatlarining 764 tasi 1 406,5 gektari (51 foiz) o‘z joyida bartaraf etilgan. Shuningdek yer qonun buzilish holatlarini keltirib chiqargan 2 ming 166  nafar shaxsga nisbatan MJtKning tegishli moddalariga asosan jami  17 milliard 36 million so‘m miqdorida ma’muriy jarima qo‘llanilgan.

Fuqarolik ishlari bo‘yicha sudlarga yer uchastkalarini o‘zboshimchalik bilan egallangan yer maydonida noqonuniy qurilgan imoratlarni bartaraf etish to‘g‘risida 600 ta (165,3 gektar) da’vo arizalari kiritilgan.

O‘lmas Barotov, O‘zA