“Turkiy kengash doirasida o‘zaro samarali hamkorlikni yanada rivojlantirishdan manfaatdormiz. Hozirgi bosqichda uning faoliyatida mamlakatimiz uchun amaliy jihatdan qiziqish uyg‘otadigan yo‘nalishlar bo‘yicha ishtirok etishga tayyormiz.”
O‘zbekiston Respublikasi Prezidenti, Shavkat Mirziyoev
Ma’lumki bugungi kunda mamlakatimiz milliy manfaatlarimizga tayangan holda o‘zaro manfaatli, ochiq tashqi siyosat olib bormoqda. Bundan maqsad – mamlakatimizning xalqaro maydondagi o‘rni va rolini mustahkamlash, tashqi va ichki iqtisodiy manfaatlarini ilgari surishdir.
Ayniqsa, Turkiy davlatlar bilan hamkorlik, ko‘plab sohalarda yangi hamkorlik platformasi bo‘lib xizmat qilishni boshlamoqda.
Kadastr agentligi tomonidan Turkiy kengashga a’zo davlatlar bilan yer ma’muriyatchiligi, geodeziya va kartografiya, davlat kadastrini yuritish va ko‘chmas mulk huquqlarini davlat ro‘yxatidan o‘tkazish kabi sohalarda o‘zaro hamkorlik aloqalarini o‘rnatish ishlari jadal olib borilmoqda.
Turkiya Respublikasi bilan hamkorlik
O‘zbekiston Respublikasi va Turkiya Respublikasi o‘rtasidagi savdo-iqtisodiy aloqalar bo‘yicha Hukumatlararo komissiyasi bayoni doirasida O‘zbekiston Respublikasi Iqtisodiyot va moliya vazirligi huzuridagi Kadastr agentligi ilk marotaba Turkiya Respublikasi Atrof-muhit, shaharsozlik va iqlim o‘zgarishi vazirligi huzuridagi Yerni ro‘yxatga olish va kadastr bosh direktorati bilan yer-mulk kadastr qaydlari, xaritachilik tizimining zamonaviylashishi borasida hamkorlikni yo‘lga qo‘ydi.
Turkiyada ilk yer-kadastr ishlari Usmonlilar imperiyasi davrida, aniqrog‘i 1858 yildagi “Xususiy mulk qonuni” bilan boshlangan bo‘lib, turli xil ijobiy o‘zgarishlar bilan hozirgi kundagi holatiga yetib kelgan.
Kadastr xizmatlari ko‘rsatish sohasini modernizatsiyalash va takomillashtirish, tizimni raqamlashtirish va uni barqarorligini ta’minlashda Turkiya tomoni bilan hamkorlik mamlakatimiz uchun ham manfaatli bo‘ladi.
Fazoviy ma’lumotlar infratuzilmasini yaxshilash bo‘yicha ham Turkiya idoralarida mavjud tajriba, jumladan, kadastr xizmatlarini yaratish va yer nazorati, Fazoviy ko‘chmas mulk tizimi (MEGSIS) faoliyati bo‘yicha tajriba almashib borilmoqda.
Ozarbayjon Respublikasi bilan hamkorlik
Turkiy kengashga a’zo, iqtisodiy hamda ijtimoiy sohalarda rivojlanishga erishgan yana bir davlat, Ozarbayjon Respublikasi bilan ham sohada hamkorlikka erishish maqsadida Ozarbayjon Respublikasi Iqtisodiyot vazirligi huzuridagi Mulk masalalari davlat xizmati hamda Kadastr agentligi o‘rtasida aloqalar yo‘lga qo‘yildi.
Bugungi kunda Ozarbayjon Respublikasi Iqtisodiyot vazirligi huzuridagi Mulk masalalari davlat xizmati hamda Kadastr agentligi vakillaridan iborat idoralararo ishchi guruh tuzilgan.
Ishchi guruhlar o‘rtasida yer hisobi, geoaxborot tizimlari, kadastr tizimlari modernizatsiyasi yo‘nalishlarida muntazam tajriba almashish ishlari amalga oshirilib kelinmoqda.
Ozarbayjon geofazoviy ma’lumotlar bilan ishlashda sezilarli yutuqlarga erishgan bo‘lib, mintaqada o‘z navigatsiya hamda joylashuv nuqtasini kuzatish tizimlariga ega davlatlardan biri hisoblanadi. Mulk masalalari davlat xizmatining sohadagi keng imkoniyatlaridan foydalanish maqsadida tomonlarning ishchi guruhlari ishtirokida onlayn sessiyalar tashkil qilinmoqda. Sessiyalar davomida Yer ma’murchiligi hamda yer hisobini yuritish, yer va kadastr nazorati, raqamlashtirish va yer boshqaruviga oid axborot tizimlari, Ozarbayjonning “Nesas” tizimi imkoniyatlari, geoaxborot tizimlari va manzillar reyestri kabi mavzular muhokamasi bo‘lib o‘tmoqda.
Yuqoridagi davlat idoralari bilan o‘zaro manfaatli yo‘nalishlarda hamkorlikni yo‘lga qo‘yish maqsadida idoralararo anglashuv memorandumi loyihasi ishlab chiqish ham ko‘zda tutilgan.
Turkmaniston Respublikasi bilan hamkorlik
Sohada olib borilayotgan ijobiy o‘zgarishlar, ilg‘or xorijiy tajriba va texnologiyalarni faoliyatda qo‘llash Agentlikning xalqaro miqyosdagi o‘rni yaxshilanishiga sabab bo‘lmoqda.
Jumladan, Turkmaniston Qishloq xo‘jaligi va atrof muhitni muhofaza qilish vazirligi tomonidan yer kadastri va yer monitoringi bo‘yicha O‘zbekiston tajribasini o‘rganishga qiziqish bildirildi.
Hozirda ikki davlat o‘rtasida o‘zaro tajriba almashish maqsadida muzokaralar olib borilmoqda.
Ma’lumki, raqamli tizimni yaratish nafaqat ilg‘or texnologiyalar, balki yangi huquqiy vositalar, biznes jarayonlarni optimallashtirishni talab etiladi. Turkiy davlatlar bilan hamkorlik sohaga yangiliklarni joriy qilish, bilim va tajriba almashinuvi, kadrlar tayyorlashda zaruriy ko‘mak olish va ko‘mak ko‘rsatishga mustahkam zamin bo‘lib xizmat qiladi.
O‘zbekistonning ko‘p vektorli tashqi siyosatni qo‘llab-quvvatlash siyosatiga yondashgan holda, Turkiy davlatlar bilan sohada hamkorlikni yo‘lga qo‘yish, mavjudlarini kengaytirish Agentlikning tashqi aloqalar yo‘nalishida alohida ahamiyatga ega hisoblanadi.
Xalqaro aloqalar va reytinglar bo‘limi bosh mutaxassisi
Nishonov Qamariddin Baxtiyorovich
