“O‘zboshimchalik bilan egallab olingan yer uchastkalariga hamda ularda qurilgan binolar va inshootlarga bo‘lgan huquqlarni e’tirof etish to‘g‘risida”gi Qonun 8-noyabr sanasidan rasman kuchga kiradi.
Qayerga murojaat qilish kerak?
Hech qayerga murojaat etishlari shart emas. Qonunga muvofiq vakolatli tashkilotlardan tuzilgan ishchi guruhlar tomonidan tasdiqlangan reja-grafik asosida har-bir hududda xatlov ishlari amalga oshirilishi belgilangan.
Mazkur reja-jadval 2024-2025-yillar uchun Qoraqalpog‘iston Respublikasi Vazirlar Kengashi, viloyatlar va Toshkent shahar hokimlarining taklifiga ko’ra Kadastr agentligi tomonidan tasdiqlandi.
Unga ko‘ra 2024-yilda respublikamizning barcha tuman va shaharlarida jami 901 ta, 2025-yilda esa 2980 ta mahallalarni qamrab olish rejalashtirilgan.
Shu va boshqalar haqida Kadastr agentligi Axborot xizmati rahbari N.Atamuratov tomonidan AOKAda o'tkazilgan brifingda ma'lumot berildi.
Ushbu reja-jadval Kadastr agentligining kadastr.uz saytida e’lon qilindi. Aholiga qulaylik yaratish maqsadida saytga kirish bilan dastlabki oynada jadval bilan tanishish taklif etiladi. “Batafsil” tugmasini bosish orqali saytning kerak bo‘limiga o‘tiladi.
Foydalanuvchilar o‘zlariga kerakli bo‘lgan mahallani topishlari uchun 3 ta harakatni amalga oshiradilar: 1-hududni tanlash, 2-tuman yoki shaharni tanlash, 3-qidiruv tugmasini bosish. Shu orqali tanlangan manzildagi mahallalar jadvali kelib chiqadi.Agarda ro‘yxatdan sizning mahallangiz nomi chiqmasa xavotirga tushmang. Demak sizning mahallangiz 2025-yildan keyingi bosqichda xatlovdan o‘tkaziladi. 2026-yil reja-jadvali 2025-yil yakuniga qadar e’lon qilinadi.
"E’TIROF" AAT haqida
Kadastr agentligining "Geoinfocom" Davlat muassasasi tomonidan O‘zboshimchalik bilan egallab olingan yer uchastkalariga hamda ularda qurilgan binolar va inshootlarga bo‘lgan huquqlarni e’tirof etish axborot tizimi — "E’TIROF" AAT dasturi ishlab chiqildi.
Qonunning 14-moddasiga asosan vakolatli tashkilotlardan tegishli ma’lumotlarni va hujjatlarni o‘zlarining axborot tizimlaridan “E’TIROF” dasturiga integratsiya qilgan holda elektron ravishda taqdim etilishi yo‘lga qo‘yildi.
“E’TIROF” AATga “Elektron hukumat” tizimi idoralararo integratsiyalashuv platformasi (IIP) orqali integratsiya qilingan tashkilotlar:
- Davlat aktivlarini boshqarish agentligi – yakka tartibdagi uy-joylar xususiylashtirilganligi yoki xususiylashtirilmaganligi to‘g‘risidagi servisi;
-Soliq qo‘mitasi – mol-mulk solig‘i bo‘yicha qarzdorlik mavjud yoki mavjud emasligini tekshirish servisi;
- Adliya vazirligi – “E-qaror” yagona elektron tizimi;
-“Raqamli hukumat loyihalarini boshqarish markazi” davlat muassasasi – Yagona identifikatsiya tizimi (One ID) va Yagona billing tizimi;
- Ijtimoiy himoya milliy agentligi – “Ijtimoiy himoya yagona reyestri” axborot tizimi hamda Tibbiy-mehnat ekspert komissiyalari to‘g‘risidagi ma’lumotlar;
- “Raqamli hukumat loyihalarini boshqarish markazi” davlat muassasasi;
- Kambag‘allikni qisqartirish va bandlik vazirligi – Yagona milliy mehnat tizimi;
- Kadastr agentligining ichki tizimlari – Ko‘chmas mulkni hisobga olish va ko‘chmas mulkka bo‘lgan huquqlarni davlat ro‘yxatidan o‘tkazish maqsadlarida foydalaniladigan integratsion axborot tizimi (UZKAD) hamda Yerga oid huquqbuzarliklarni aniqlash, hujjatlar to‘plamini shakllantirish va ularni ko‘rib chiqish monitoringini yuritish (“E-YER NAZORAT” AAT).
Jarayonlar ochiq va shaffof bo‘lishini ko‘zlagan holda "E’TIROF" dasturida barcha jarayonlarni aholi ko‘rib, kuzatib borishi mumkin. Tasdiqlangan reja-jadval bo‘yicha xatlovdan o‘tkazilgan mahallalarni hamda har bir obyekt to‘g‘risidagi ma’lumotlar e’longa chiqariladi hamda ushbu obyektga tegishli davlat idoralari tomonidan berilgan ijobiy yoki salbiy xulosalarni onlayn ko‘rish, xulosadan norozi bo‘lgan taqdirda 1 oy ichida e’tiroz bildirish imkoniyati yaratildi.
"E’TIROF" AAT barcha uchun ochiq platforma. Ushbu tizimga etirof.kadastr.uz saytidan ro‘yxatdan o‘tgan holda kirish va kuzatish imkoniyati mavjud.
