O‘zbekiston Respublikasi Davlat chegarasining delimitatsiya va demarkatsiya qilish yuzasidan ikki tomonlama kelishilgan reja-jadvallariga muvofiq Kadastr agentligi Davlat chegarasini delimitatsiya, demarkatsiya qilish bo‘limi qo‘shni davlatlar bilan bo‘lib o‘tgan muzokaralarda ishtirok etdi. 

Bunda O‘zbekiston Respublikasi manfaatlaridan kelib chiqqan holda Davlat chegara chizig‘ini o‘tishi yuzasidan belgilangan tartibda takliflar tayyorlandi hamda tegishli vazirlik va idoralar bilan kelishilgan holda Hukumatlararo komissiyaga taqdim etildi.

O‘zbekiston Respublikasi va Qirg‘iziston Respublikasi hukumatlari delegasiyalarining o‘zbek-qirg‘iz Davlat chegarasini demarkatsiya qilish bo‘yicha Qo‘shma komissiyasi ishchi guruhlari doirasida 2 ta uchrashuvi bo‘lib o‘tdi. Shuningdek, 2 ta dala topogeodeziya ishlari bajarildi.

2024-yil yanvar oyida kosmik suratlar asosida ortofotoplanlar tayyorlash, gidrografik ishlar ma’lumotlari va plan-balandlik o‘lchovlarini qayta ishlash ishlari Tojikistonlik mutaxassislar bilan birgalikda amalga oshirildi. O‘zbekiston Respublikasi va Tojikiston Respublikasi hukumatlari delegasiyalarining o‘zbek-tojik Davlat chegarasini demarkatsiya qilish bo‘yicha Qo‘shma komissiyasi ishchi guruhlari doirasida 2 ta uchrashuvi bo‘lib o‘tdi.

O‘zbekiston Respublikasi bilan Turkmaniston Respublikasi Davlat chegarasini delimitatsiya va demarkatsiya qilish masalalari bo‘yicha hukumatlararo Qo‘shma komissiyasi ishchi guruhlarining 3 ta uchrashuvi bo‘lib o‘tdi hamda 1 ta dala topogeodeziya ishlari bajarildi.

Bugungi kunda, o‘zbek-qirg‘iz, o‘zbek-tojik va o‘zbek-turkman Davlat chegaralarini demarkatsiya qilish jarayonlari davom etmoqda.