Kadastr tizimida ham korrupsiyaning oldini olish va komplayens nazorat tizimi joriy etildi. Mazkur xizmat o‘z faoliyatini boshlagan davrdan boshlab tizimda samarali ishlar yo‘lga qo‘yildi va 2021 yilga nisbatan korrupsion holatlar kamaydi.
Xususan, xodimlarning korrupsiyaviy xatti-harakatlari, manfaatlar to‘qnashuvi, korrupsiyaga qarshi boshqa qonun buzarliklar bilan bog‘liq masalalar to‘g‘risida kelib tushgan murojaatlarning soni – 11 tani tashkil etdi. Ushbu ma’lumotlar Bo‘stonliq, Qibray, Piskent, Ohangaron, O‘rta Chirchiq va Yuqori Chirchiq tumanlari, Angren, Ohangaron, Olmaliq, Yangiyo‘l va Nurafshon shaharlari filiallarida ishlovchi xodimlarga nisbatan olingan.
Mazkur murojaatlardan 5 tasi tasdig‘ini topmagan yoki rad etilgan, 6 tasi yuzasidan intizomiy jazo chorasi qo‘llanilgan, jinoyat ishi va ma’muriy ish qo‘zg‘atilgan murojaatlar yo‘q. Bundan tashqari, boshqarmalarda mehnat qilayotgan 700 nafardan ziyod xodimlar orasida korrupsion xavf-xatarlarni minimallashtirish maqsadida Agentlik va Palataning Toshkent viloyati boshqarmasi rahbarlari, bo‘lim-filial rahbarlari va tizim xodimlari doimiy ravishda targ‘ibot-tashviqot va yakka tartibdagi profilaktik tadbirlar o‘tkazilmoqda. Shuningdek, Kadastr agentligi hamda Davlat kadastrlari palatasining shtatlar jadvallaridagi korrupsiyaga eng ko‘p moyil bo‘lgan lavozimlar tahlil etildi. Korrupsiyaviy xavf-xatarlar toifalar bo‘yicha yuqori, o‘rta, past nisbatlarga ajratilib, hududiy va tarkibiy bo‘linmalari kesimida baholandi.
Eng yuqori xavf xatarlar toifasiga : Ko‘chmas mulk huquqlarini davlat ro‘yxatidan o‘tkazish bo‘limi, tuman-shahar filial kadastr muhandislari, tuman-shahar topografik va kartografik xaritalarini tayyorlash topograflari, tuman-shahar filial arxivariuslari, tuman-shahar bo‘limlari bosh inspektori, yetakchi inspektor lavozimlari kiritilib, alohida nazoratga olindi.
Davlat xaridlari yo‘nalishida boshqarmada tuzilgan 131 ta shartnomalarda “manfaatlar to‘qnashuvi”ni aniqlash va bartaraf etish bo‘yicha komplayens-nazorat xizmati tomonidan monitoring ishlari amalga oshirildi. Hisobot davrida 1 ta holat aniqlanib, o‘z vaqtida bartaraf etildi. Shuningdek, boshqarmalardagi vakant o‘rinlarni to‘ldirish, lavozimdan lavozimga o‘tkazish bo‘yicha jami 140 nafar nomzodlar bo‘yicha o‘rganish ishlari amalga oshirildi. Yil davomida 288 ta holatda ichki tartib va mehnat intizomini buzgani uchun 234 nafar xodimga hayfsan, 54 nafariga nisbatan jarima jazolari qo‘llanildi. Ishga qabul qilish jarayonida manfaatlar to‘qnashuvini oldini olish, shuningdek, korrupsiyaga qarshi kurashish bo‘yicha kelishuvlar imzolandi.
Aniqlangan qonunbuzarliklar va ularga ta’sir choralari yuzasidan 2022 yil davomida 3 ta holatda (2021 yil 4 ta holat) Palataning Toshkent, Yangiyo‘l tumanlarida ishlovchi 3 nafar xodim pora olish chog‘ida huquqni muhofaza qiluvchi idoralar xodimlari tomonidan ushlangan. 2022 yil davomida 19 nafar kadastr xodimlari Jinoyat kodeksining tegishli moddalari bilan qo‘zg‘atilgan 13 ta jinoyat ishi doirasida gumonlanuvchi tariqasida jalb qilindi. Shundan 1 nafari oqlandi, 1 nafariga nisbatan tergov harakatlari tugatildi, 7 nafari jinoiy javobgarlikka tortildi, 2 tasi sud jarayonida, 8 tasiga nisbatan tergov harakatlari davom etmoqda.
O‘rganish va tahlillar natijasida o‘z mansab yoki xizmat mavqeidan shaxsiy manfaatlarini yoxud o‘zga shaxslarning manfaatlarini ko‘zlab moddiy yoki nomoddiy naf olish maqsadida qonunga xilof ravishda korrupsiyaviy xatti-harakatlar sodir etilishi mumkin bo‘lgan asosiy yo‘nalishlar aniqlangan bo‘lib, komplayens-nazorat xizmati tomonidan nazoratga olingan.
Yulduz Uralova,
Kadastr agentligi Toshkent viloyati boshqarmasi
Axborot xizmati rahbari
