Ishonch telefoni : 1097 Kirish

Yer uchastkalarini noqonuniy o‘zlashtirganlar jarimaga tortildi

13.12.2022
785

Kadastr agentligi Sirdaryo viloyat boshqarmasi va tuman, shahar bo‘limi inspektorlari joriy yil 11 oyi davomida jismoniy va yuridik shaxslar tomonidan yer uchastkalarini o‘zboshimchalik bilan egallab olishga doir 3 ming 368 ta qonunbuzilish holatlarini aniqladi.

Mazkur holatlarga nisbatan "Ma’muriy javobgarlik to‘g‘risida"gi kodeksning tegishli moddalari bilan ma’muriy ish yuritilgan.

– Shu ishlar yuzasidan hududiy shahar-tuman inspektorlari tomonidan 2 572 nafar huquqbuzarga nisbatan 4 mlrd. 637 mln. 100 ming so‘m jarima jazosi tayinlanib, shundan 2 milliard 149 million so‘mi undirilgan, – deydi Kadastr agentligi Sirdaryo viloyati boshqarmasi boshlig‘i Olimjon Maxarov. – Bundan tashqari, jarima jazosi qo‘llanilgan shaxslar tomonidan jarimalarni belgilangan vaqtlarda to‘lamaganligi sababli 344 ta tegishli hujjat Majburiy ijro byurosiga jarimalarni undirish uchun yuborilgan.

Shuningdek, "Ma’muriy javobgarlik to‘g‘risida"gi kodeksning 60-moddasi 2-qismiga asosan yuritilgan ishlarning 673 tasi jismoniy va yuridik shaxslar tomonidan birinchi marta sodir etilganligi va o‘zboshimchalik bilan egallagan yer uchastkasini qaytarganligi, oqibatlarini bartaraf etgani uchun huquqbuzarlarga nisbatan ma’muriy javobgarlik ishi tugatilgan va ma’muriy jazodan ozod etilgan.