Yer nazorati tadbirlari davom etmoqda
Kadastr agentligining Namangan viloyati boshqarmasi tomonidan kuchaytirilgan yer va kadastr nazorati hamda yer maydonlarining talon-toroj qilinishining oldini olishga qaratilgan tadbirlar davom etmoqda.
Asosiy e’tibor qishloq xo‘jaligi yerlari, magistral yo‘llar atrofidagi hududlar va aholi punktlarida o‘zboshimchalik bilan qurilgan bino va inshootlarga qaratilmoqda. Ushbu ishlarni samarali tashkil etish uchun 16 ta ishchi guruh tuzilib, ular o‘z hududlarida yer uchastkalarining talon-toroj qilinishining oldini olish bo‘yicha faoliyat olib bormoqda.
Pop tumanida o‘tkazilgan nazorat tadbirlari davomida tumandan o‘tuvchi A-373 avtomobil yo‘lining 193-194-kilometr oralig‘ida, yo‘lga yaqin muhofaza hududida, fuqarolar tomonidan o‘zboshimchalik bilan 35 dan 120 kvadrat metrgacha bo‘lgan noqonuniy savdo shahobchalari qurilgani va reklama banerlari o‘rnatilgani aniqlandi.
Kadastr inspektorlari tomonidan ushbu holatning huquqiy oqibatlari tushuntirilgach, fuqarolar noqonuniy qurilmalarni o‘z ixtiyorlari va hisoblaridan bartaraf qildilar.
