Ishonch telefoni : 1097 Kirish

Kadastr agentligida xodimlar qay darajada ijtimoiy muhofaza qilinmoqda?

17.08.2022
785

Inson yaratilibdiki u jamiyatda o‘z o‘rnini topish va yutuqlarga erishishga harakat qiladi. Agar mantiqan o‘ylab qaraydigan bo‘lsak, inson umrining deyarli chorak qismini ishlab o‘tkazar ekan. Bu o‘z navbatida har bir tashkilot zimmasiga xodimlar haqida chuqur qayg‘urish, g‘amxo‘rlik qilish va ijtimoiy muhofaza qilish masʼuliyatini yuklaydi.

Kadastr agentligida bugungi kunda 9200 dan ortiq ishchi xodimlar faoliyat olib boradi. Mehnat kodeksining 177-moddasiga asosan Agentlik tizimida 205 ta quyi tashkilotlarning barchasida jamoa shartnomalari tuzilgan va ishchi xodimlar to‘liq Kasaba uyushmasi aʼzoligiga qabul qilingan.

Xodimlarning huquqlarini himoya qilish maqsadida mehnat shartnomasini Ish beruvchining tashabbusi bilan bekor qilish faqatgina kasaba uyushmasi qo‘mitasining oldindan rozligini olgan holda amalga oshirilishi yo‘lga qo‘yildi va bu borada Jamoa shartnomalariga tegishli o‘zgartirish kiritildi. Shuningdek, xodimlarning taʼtilga chiqishi, taʼtil muddatlari, ularni berish tartibi va shartlari bo‘yicha ichki meʼyoriy hujjatlar tartibga solindi.

“Sog‘ tanda – sog‘lom aql” deganlaridek xodimlarning salomatligiga alohida eʼtibor qaratilmoqda. Agentlik markaziy apparati binosidan tez tibbiy yordam va sport xonalari tashkil etilib, xodimlarga qulay sharoitlar yaratildi. Salomatligida jiddiy muammolar bo‘lgan 4 nafar xodimlar tibbiy ko‘rikdan o‘tkazilib, ularni sog‘lomlashtirish choralari ko‘rildi va sarf-xarajatlar agentlik Kasaba uyushmasi tomonidan qoplab berildi.

Agentlik Kasaba uyushmasi nafaqat xodimlarning balki ularning ota-onalari, oila aʼzolariga ham imkoniyat darajasida ijtimoiy ko‘maklashmoqda. birgina misol, joriy yilning o‘tgan davrida 20 dan ortiq xodimlarning ota-onalari sog‘lomlashtirish maskanlariga yuborildi. Shu bilan birga, soha xodimlari oilalar o‘rtasida estafeta musobaqalari, tennis, shaxmat, shashka o‘yinlari o‘tkazildi.

Yurtimiz ommaviy nishonlanadigan bayramlar hamda muhim sanalar Kadastr agentligi tizimida ham keng nishonlanadi.

Jumladan, 14 yanvar “Vatan himoyachilari kuni”, 8 mart “Xalqaro xotin-qizlar kuni”, 21 mart “Navro‘z” bayrami, 1 iyun “Bolalarni himoya qilish kuni” munosabati bilan Agentlik xodimlari hamda ularning farzandlari turli sog‘lomlashtirish va qiziqarli ko‘ngilochar tadbirlar muntazam o‘tkazilib kelinmoqda.

Kadastr agentligi tizimida faoliyat olib borayotgan xodimlarni, ayniqsa xotin-qizlarning “Yangi O‘zbekiston bo‘ylab sayohat qil!” shiori ostida respublikaning Bo‘stonliq tumani va Shahrisabz shaharlaridagi tarixiy qadamjo va so‘lim go‘shalariga sayr qilishlari orqali ularning madaniy va maroqli hordiq chiqarishlari taʼminlandi.

Kasaba uyushmasining yana bir vazifasi bu oilaviy sharoiti og‘ir bo‘lgan xodimlarni har tomonlama qo‘llab-quvvatlashdir. Ayni shu maqsadda Agentlik tizimida faoliyat olib borayotgan oilaviy sharoiti og‘ir, kam taʼminlangan 5 ta xodimga BHMning besh baravari miqdorigacha bo‘lgan moddiy yordam ajratildi. 2 nafar xodimning yubiley yoshga kirganligi munosabati bilan ularning oylik maoshi miqdorining bir baravari miqdorida moddiy yordam berilishi taʼminlandi, shuningdek, 2 nafar xodimlarning to‘y (nikoh) marosimlari hamda sunnat to‘yi uchun moddiy yordamlar ajratildi.

Mehnat nizolarini ko‘rish komissiyasi tomonidan 1 ta holatda nizoli masalalar ko‘rib chiqib, ijobiy hal etildi.

Bugungi kunda Kadastr agentligi Kasaba uyushmasi qo‘mitasi tomonidan o‘z vakolati doirasida ishlar tashkil etilib, bu borada qatʼiy nazorat tizimi asosida zarur chora-tadbirlar amalga oshirib kelinmoqda.

Nilufar Sultanova,

Kadastr agentligi Kasaba uyushmasi qo‘mitasi raisi.