Kadastr agentligining Fazoviy ma’lumotlar milliy infratuzilmasini rivojlantirish boshqarmasi tomonidan ISO 19103 “Geographic information – Conceptual schema language” xalqaro standarti davlat tiliga tarjima qilinib, milliy standart shakliga keltirildi va Texnik qo‘mita tomonidan tegishli xulosa olinib, O‘zbekiston standartlar instituti tomonidan O‘zMSt ISO 19103:2024 “Geografik ma’lumotlar. Konseptual sxema tili” milliy standarti sifatida qabul qilindi.
O‘zbekiston Respublikasi Prezidentining 2022-yil 20-oktyabrdagi “O‘zbekiston Respublikasi Iqtisodiyot va moliya vazirligi huzuridagi Kadastr agentligi faoliyatini yanada takomillashtirish chora-tadbirlari to‘g‘risida”gi PQ-405-son qaroriga asosan 2023-yilda Kadastr agentligi huzurida STQ-19 “Fazoviy ma’lumotlar” sohasini standartlashtirish bo‘yicha texnik qo‘mita faoliyati yo‘lga qo‘yilgan.
Ushbu texnik qo‘mita fazoviy ma’lumotlar sohasini tartibga soluvchi barcha ishlab chiqiladigan standartlarni ishlab chiqish, taqdim etilgan fazoviy ma’lumotlar sohasidagi milliy standart loyihalarini ko‘rib chiqish va tegishli xulosa berish bilan birga, o‘zining yillik rejasiga asosan sohaga oid standartlarni ishlab chiqish va standartlashtirish bo‘yicha Milliy organga tasdiqlash uchun kiritish ishlarini amalga oshiradi.
