Qashqadaryoda yil boshidan buyon zaxiraga qaytarilgan 30 ming gektardan ziyod yer maydonlari davlat mulki sifatida davlat ro‘yxatidan o‘tkazildi. Bu haqda Davlat kadastrlari palatasi Qashqadaryo viloyati boshqarmasi matbuot xizmati “darakchi.uz”ga xabar qildi.
Maʼlum qilinishicha, Qashqadaryo viloyatida bugungi kunga qadar viloyat hokimining tegishli qarori bilan 30 041 gektar yer maydonlari zaxiraga qaytarilib, 28 412 gektari ochiq elektron tanlovlarga chiqarilgan. Zaxiraga qaytarilgan yer maydonlari Davlat kadastrlari palatasi Qashqadaryo viloyati boshqarmasi tomonidan davlat mulki sifatida davlat ro‘yxatidan o‘tkazilib, yer maydonlariga kadastr hujjatlari tayyorlangan.
Qayd etilishicha, ochiq elektron tanlovga chiqarilgan yerlarning 8 158 gektari 18 300 nafar jismoniy shaxslarga dehqon xo‘jaligi tashkil etish uchun, 6 205 gektari 227 nafar yuridik shaxslarga qishloq xo‘jalik ekinlari yetishtirish uchun ijara huquqi asosida ajratib berilgan.
Maʼlumot uchun, noqishloq yer maydonlari faqat auksion orqali sotilishi belgilangan bo‘lib, O‘zbekiston Respublikasi Vazirlar Mahkamasining 2022-yil 14-fevraldagi "Qishloq xo‘jaligiga mo‘ljallanmagan yer uchastkalarini xususiylashtirish to‘g‘risida"gi O‘zbekiston Respublikasi Qonunini amalga oshirish chora tadbirlari haqidagi 71-sonli qarori qabul qilinishi natijasida yer maydonlari faqat ochiq auksion orqali xususiy mulk sifatida sotiladigan yoki ijaraga beriladigan bo‘ldi. Mazkur qaror ijrosini taʼminlash maqsadida tadbirkorlik maqsadlari uchun "Yerelektron" avtomatlashtirilgan axborot tizimiga bugungi kungacha 238 gektardan iborat 6 501 ta yer uchastkalari joylashtirilgan bo‘lib, shundan tadbirkorlik maqsadlari uchun 3 081 ta (65 ga) yer uchastkalari mulk va ijara huquqi asosida auksion savdolariga chiqarildi.
