2022 yil davomida Kadastr agentligi faoliyati bilan bog’liq bir qator normativ-huquqiy hujjatlar qabul qilindi, jumladan:
“Ko‘chmas mulkka bo‘lgan huquqlarni davlat ro‘yxatidan o‘tkazish to‘g‘risida” O‘RQ–803-son O‘zbekiston Respublikasining Qonuni.
Mazkur Qonun 10 ta bob va 74 ta moddadan iborat bo‘lib, ko‘chmas mulkning yer uchastkalari, binolar, inshootlar, shu jumladan qurilishi tugallanmagan ob’ektlar, ko‘p yillik dov-daraxtlar, mulkiy majmua sifatidagi korxonalar sifatidagi turlariga bo‘lgan huquqlarni davlat ro‘yxatidan o‘tkazishga nisbatan tatbiq etiladi.
“Yer munosabatlarida tenglik va shaffoflikni ta’minlash, yerga bo‘lgan huquqlarni ishonchli himoya qilish va ularni bozor aktiviga aylantirish tizimi takomillashtirilishi munosabati bilan O‘zbekiston Respublikasining ayrim qonun hujjatlariga o‘zgartish va qo‘shimchalar kiritish to‘g‘risida”gi O‘RQ–775-son O‘zbekiston Respublikasi Qonuni.
Qonun bilan 4 ta kodeks va 21 ta qonunga, jumladan Fuqarolik, Yer, Soliq, Shaharsozlik kodekslariga o‘zgartirish va qo‘shimchalar kiritilgan bo‘lib, Yer kodeksiga kiritilgan o‘zgartishlarga ko‘ra, hokimliklarning qishloq xo‘jaligiga mo‘ljallangan yerlarni ijaraga berish bo‘yicha ochiq elektron tanlov yakunlarini tasdiqlash vakolati chiqarib tashlandi. Shuningdek, yer uchastkasidan belgilanganidan boshqa maqsadlarda foydalanilganda Kadastr agentligi organlari yer egasini yoki yerdan foydalanuvchini oldindan xabardor qilgandan keyin yer uchastkasiga bo‘lgan huquqni bekor qilish haqida sudga da’vo arizasi kiritishi belgilandi.
“Davlat kadastrlari to‘g‘risida” O‘zbekiston Respublikasi qonuniga o‘zgartirish va qo‘shimchalar kiritilib, mazkur qonunning 10‑moddasida Kadastr agentligi tomonidan Milliy geografik axborot tizimini yuritish sohasidagi maxsus vakolatli organ hisoblanishi belgilandi.
Vazirlar Mahkamasining “Davlat yer va kadastr nazoratini amalga oshirish tartibi hamda Davlat geodeziya nazoratini amalga oshirish tartibi to‘g‘risidagi nizomlarni tasdiqlash haqida” 2022 yil 14 apreldagi 183-son qarori.
Qaror bilan:
Kadastr agentligi davlat kadastr nazorati bo‘yicha maxsus vakolatli davlat organi etib belgilandi.
Kadastr agentligi organlarining davlat yer va kadastr nazoratini amalga oshirishdagi asosiy vazifalari etib quyidagilar belgilandi:
yer toifasidan qat’iy nazar, barcha turdagi yer uchastkalari hamda bino va inshootlarga bo‘lgan huquqlarni davlat ro‘yxatidan o‘tkazmaslik holatlarini aniqlash;
yer uchastkalarining o‘zboshimchalik bilan egallab olinishi va ushbu yer uchastkalarida o‘zboshimchalik bilan imorat qurilishini aniqlash;
yer uchastkasi chegaralarini o‘zboshimchalik bilan o‘zgartirishga yo‘l qo‘ymaslik choralarini ko‘rish;
yer uchastkalaridan maqsadsiz foydalanish holatlarini o‘z vaqtida aniqlash va chora ko‘rish;
davlat kadastrlarini yuritish tartiblariga rioya qilinishini ta’minlashga qaratilgan davlat kadastr nazoratini amalga oshirish.
Vazirlar Mahkamasining “Ko‘chmas mulkka bo‘lgan huquqlarning hisobini yuritishda shaffoflikni ta’minlash, shuningdek, kadastr sohasidagi ayrim ma’muriy tartib-taomillarni takomillashtirish chora-tadbirlari to‘g‘risida” 2022 yil 18 oktabrdagi 610-son qarori.
Qaror bilan:
Ko‘p yillik dov-daraxtlarga bo‘lgan mulk huquqini davlat ro‘yxatidan o‘tkazish bo‘yicha davlat xizmatlari ko‘rsatishning ma’muriy reglamenti;
Bino va inshootlarning mansubligi va tarkibi to‘g‘risida ma’lumotnoma berish bo‘yicha davlat xizmatlari ko‘rsatishning ma’muriy reglamenti;
Toshkent viloyati va Toshkent shahrida ko‘chmas mulk bo‘yicha kadastr muhandisining malaka shahodatnomasini berish bo‘yicha davlat xizmatlari ko‘rsatishning ma’muriy reglamenti tasdiqlandi.
Vazirlar Mahkamasining “O‘zbekiston Respublikasi Fazoviy ma’lumotlar sohasini tartibga soluvchi ayrim normativ-huquqiy hujjatlarni tasdiqlash to‘g‘risida” 2022 yil 26 oktyabrdagi 620-son qarori.
Qarorga asosan:
Kadastr agentligi fazoviy ma’lumotlar sohasidagi maxsus vakolatli davlat organi etib belgilandi;
Milliy geografik axborot tizimi davlat kadastrlari yagona tizimini yuritish, ko‘chmas mulkka oid davlat xizmatlarini ko‘rsatishda vakolatli organlar hamda boshqa tashkilotlar bilan idoralararo elektron hamkorlik uchun zarur bo‘lgan fazoviy ma’lumotlarning yagona manbai hisoblanib, Kadastr agentligi tomonidan yuritilishi belgilandi.
Shuningdek, Agentlikka kelishish uchun taqdim etilgan normativ-huquqiy hujjatlar loyihalarini ko‘rib chiqishda 2022 yil davomida 400 dan ortiq normativ-huquqiy hujjat loyihalari o‘rganib chiqildi.
