Namangan viloyati kadastr tizimida joriy yilning sakkiz oyi davomida elektron axborot almashinuv tizim orqali aholi va tadbirkorlarning hamda korxona, tashkilotlarning 50 mingdan ziyod murojaatlarga o‘z vaqtida javob berildi.
Viloyat kadastr sohasida olib borilayotgan yer hisobini raqamli iqtisodiyotga joriy etish yo‘lidagi keng ko‘lamli islohotlar natijasida bugungi kunda Davlat kadastrlari palatasining Namangan viloyati boshqarmasi tarkibidagi bo‘lim, shahar va tuman filiallari barchasi optik tolali kabellar orqali yuqori tezlikdagi internet tarmog‘iga ulandi.
Yuqori unumdorlikka ega serverlar ishga tushirildi. Barcha viloyat kadastr tarmog‘idagi 420 dan ortiq kompyuterlar zamonaviylariga almashtirildi. Ularni elektr energiya taʼminotini barqaror ishlashi taʼminlandi. Hamkor tashkilotlar bilan yuqori tezlikdagi axborot almashinuv tarmoqlari yo‘lga qo‘yildi.
Yer hisobini raqamlashtirish natijasida qisqa vaqt ichida 110 mingdan ziyod qishloq xo‘jaligi yerlaridan foydalanuvchilarning 434,2 ming gektar (89%) yer maydonlari raqamlashtirildi va elektron xaritada aniq joyi, chizmasi va chegarasi haqidagi maʼlumotlar «Kadastr va ko‘chmas mulklarni ro‘yxatdan o‘tkazish integratsion axborot tizimi»ga kiritildi. Elektron xaritada hisobga olingan 76,7 mingta yerdan foydalanuvchilarning 314,3 gektar (72%) yer maydonlari davlat ro‘yxatidan o‘tkazildi.
Viloyat kadastr boshqarmasi tomonidan «mahallabay» ish tashkil qilinishi natijasida joriy yil sakkiz oy davomida 12,3 mingta qo‘shimcha obyektlar, 11,4 mingta ko‘chmas mulk obyektlariga bo‘lgan huquqlar davlat ro‘yxatidan o‘tkazildi, bu ishlar davom etmoqda.
Viloyat bo‘yicha 7233 ta lotda 134,2 gektar bo‘sh yer uchastkalari tadbirkorlik faoliyatini yuritish uchun “Yerelektron” tizimiga kiritilib, 2956 ta obyektlardagi 49,1 gektar yer uchastkalari auksion savdosiga chiqarildi. Vakolatli idoralar tomonidan 733 ta yer uchastkalari yaʼni 19,2 gektar yerlarni auksionga chiqarish uchun ko‘rib chiqilmoqda.
Kuni kecha Prezident Shavkat Mirziyoyev raisligida asosiy oziq-ovqat mahsulotlari narxining barqarorligini taʼminlash va zaxirasini yaratish chora-tadbirlari bo‘yicha videoselektor yig‘ilishi o‘tkazildi. Yig‘ilishda qishloq xo‘jaligi mahsulotlari yetishtirish uchun qo‘shimcha yer ajratish masalalari ham ko‘rib chiqildi. Bu yo‘nalishda kadastr tizimiga ham katta vazifalar belgilab berildi.
So‘nggi ikki oy davomida 1107 dan ziyod yer maydonlari savdoga chiqarildi, shundan 993 tasi yoki 90% tadbirkorlik va xizmat ko‘rsatish joylarini va ularda ish o‘rinlari tashkil etish uchun qo‘yilgan.
Sohaga axborot kommunikatsiya texnologiyalarini joriy etish va yer hisobini raqamlashtirish natijasida:
- yerlarni auksionga chiqarish jarayonlari ijara huquqida – 48 kundan 15 kunga, mulk huquqida – 74 kundan 20 kunga qisqartiriladi;
- yer maydonlarini baholash ekspertizadan o‘tkazilmaydi, haqiqiy bahosi auksionda aniqlanadi;
- 2023-yil 1-yanvardan boshlab yerlarni auksionga chiqarishda kadastr idoralarida bor maʼlumotlarni boshqa idoralar bilan kelishish tartibi bekor qilinadi.
Yer hisobini raqamlashtirish natijasida ish jarayonida tamagirlik, poraxo‘rlik, mansab vakolatini suiisteʼmol qilish kabi korrupsiya holatlarga yo‘l qo‘ymaslik va uni oldini olishga qaratilgan tadbirlar o‘zining samarasini beradi va soha korrupsiyadan holi hududga aylanadi.
Davlat kadastrlari palatasining Namangan viloyati boshqarmasi boshlig‘i q.G‘apporov.
