“9 dekabr – Xalqaro korrupsiyaga qarshi kurashish kuni”ga bag‘ishlangan Aksilkorrupsiya haftaligi doirasida Kadastr agentligi faoliyati ochiqligini ta’minlash, korrupsion xatarlarni oldini olish va bartaraf etish, sohada korrupsiyaga karshi kurashishning zamonaviy tizimlarini joriy etishga bag‘ishlangan ochiq eshiklar kuni o‘tkazildi.

Tadbirda OAV vakillari, Korrupsiyaga qarshi kurashish agentligi hamda Kadastr agentligi mas’ullari ishtirok etishdi.

Tadbir avvalida Kadastr agentligi direktorining birinchi o‘rinbosari Atabek Allaberganov sohada amalga oshirilayotgan islohotlar haqida so‘z yuritib o‘z fikrlarini bildirdi.

“Kadastr agentligi tashkil etilgan paytdan boshlab asosiy e’tibor sohani raqamlashtirish, barcha yerlar, bino-inshootlarni to‘liq hisobga olishga qaratildi. Raqamlashtirish bizga nima beradi degan savol paydo bo‘lishi mumkin. Raqamlashtiri bizga avvalo shaffoflikni va aniqlikni beradi. Raqamlashtirish orqali inson omilini kamaytiriladi va dasturlar bilan ishlashga o‘tiladi. Inson omilini kamaytirish korrupsiyani oyog‘iga bolta urish degani.” – A.Allaberganov.

Korrupsiyaga qarshi kurashish agentligi bosh inspektori Bekzod Rahmonov ham respublikamizda korrupsiyani oldini olishda olib borilayotgan ishlar to‘g‘risida ma’lumot berib, kadastr sohasidagi ijobiy o‘zgarishlarni alohida e’tirof etdi.

Shundan so‘ng mas’ullar tomonidan:

·    Kadastr xizmatlarini ko‘rsatish va yer hisobini yuritishda amalga oshirilgan ishlar;

·    Yer nazorati yo‘nalishida olib borilayotgan islohotlar;

·    Agentlikning Komplaens-nazorat xizmati tomonidan amalga oshirilgan tadbirlar to‘g‘risida ma’ruzalar qilindi va OAV vakillari bilan savol-javob o‘tkazildi.