Kadastr agentligi va uning tizim tashkilotlari tomonidan 2022-yil mobaynida Yerni masofadan turib zondlash, geodeziya va kartografiya sohasida bir qator ishlar amalga oshirildi. Jumladan:
Normativ hujjatlarini takomillashtirish bo‘yicha.
Geodeziya va kartografiya sohasida jami 15 ta normativ-huquqiy hujjatlar ishlab chiqildi va 14 tasi qabul qilingan. Shundan, 1 ta O‘zbekiston Respublikasi qonuni, 3 ta O‘zbekiston Respublikasi Vazirlar Mahkamasining qarori va 10 ta idoraviy hujjat qabul qilingan, 1 tasi Adliya vazirligi tomonidan ko‘rib chiqilmoqda.
Geodeziya sohasida.
Davlat geodeziya tarmog‘i punktlarining joyida saqlanib qolganligini o‘rganish maqsadida Kadastr agentligining Respublika aerogeodeziya markazi va uning hududiy bo‘linmalari tomonidan 5 084 ta triangulyatsiya punktlari tekshirildi shuningdek, 1 738 ta nivelir belgilari ham tekshirildi.
Bundan tashqari, Farg‘ona vodiysi, Sirdaryo va Jizzax viloyatlarida punktlar zichligi yetarli bo‘lmagan joylarga 47 ta geodezik punktlar o‘rnatildi hamda 982 km. uzunlikda 4-sinf nivelir ishlari bajarildi.
Qoraqalpog‘iston Respublikasi, Jizzax, Navoiy, Namangan, Samarqand, Sirdaryo va Toshkent viloyatlarida 861 ta geodeziya o‘lchov ishlari bajarildi.
Davlat balandlik tarmog‘ini yaratish maqsadida 2022 yilda Qashqadaryo, Navoiy va Samarqand viloyatlarida 752,1 km uzunlikda 1-sinf nivelirlash ishlari olib borildi.
Qoraqalpog‘iston Respublikasi, Buxoro, Qashqadaryo, Navoiy, Samarqand va Surxondaryo viloyatlarida 8 953 ta aerosuratlarni planli va balandli bog‘lash ishlari amalga oshirildi.
Kartografiya sohasida.
2022 yil mobaynida respublika bo‘yicha jami 117 707 kv.km maydonda topografik xaritalar yangilandi, jumladan, Qoraqalpog‘iston Respublikasida 26 101 kv.km, Buxoro viloyatida 9 770 kv.km, Jizzax viloyatida 19 837 kv.km, Qashqadaryo viloyatida 5 100 kv.km, Navoiy viloyatida 7 550 kv.km, Samarqand viloyatida 15 650 kv.km va Surxondaryo viloyatida 33 699 kv.km
Respublika bo‘yicha jami 63 900 kv.km. maydonda ortofotoplanlar yaratildi.
O‘zbekiston Respublikasi, Qoraqalpog‘iston Respublikasi va viloyatlar kesimida jami 448 900 kv.km maydonda Iqtisodiy xaritalari yaratildi.
Qoraqalpog‘iston Respublikasi (166 590 kv.km), Andijon (4 240 kv.km), Qashqadaryo (28 570 kv.km) va Farg‘ona viloyatlari (6 760 kv.km)ning Interaktiv raqamli xaritalari yaratildi.
Andijon viloyatining 5 460 kv.km, Qashqadaryo viloyatining 32 280 kv.km, Namangan viloyatining 9 440 kv.km, Farg‘ona viloyatining 8 570 kv.km va Xorazm viloyatining 12 930 kv.km maydonining topografik xaritalari nashr qilindi.
Qashqadaryo viloyatining 32 300 kv.km va Xorazm viloyatining 12 930 kv.km maydonining topografik xaritalari adadlash ishlari amalga oshirildi.
Shuningdek, Geografiya fanidan 4, 5 va 6-sinf o‘quvchilari uchun o‘quv atlasi hamda yozuvsiz xaritalar yaratildi.
Kosmik va aerosuratlardan foydalanish sohasida.
2022 yilda respublika hududida jami 77 539,0 kv.km maydonda aero suratga olish ishlari amalga oshirildi.
Geografik obyektlar nomlari sohasida.
Kadastr agentligi Geografik obyektlarga nom berish va ularni qayta nomlash to‘g‘risidagi takliflarni ekspertizadan o‘tkazish, geografik obyektlarning nomlari davlat reyestrini yuritish ishlari amalga oshirilmoqda.
2022 yil davomida Kadastr agentligiga Qoraqalpog‘iston Respublikasi Vazirlar kengashi, viloyatlar va Toshkent shahar hokimliklari tomonidan geografik obyektlarga nom berish va ularni qayta nomlash to‘g‘risidagi takliflarni davlat ekspertizasidan o‘tkazish bo‘yicha 48 897 ta nom ekspertizadan o‘tkazish uchun taqdim etildi.
Ushbu takliflar Kadastr agentligining Ekspert komissiyasi tomonidan o‘rganib chiqilib, 36 006 ta nom bo‘yicha qonunchilik hujjatlariga muvofiqligi yuzasidan ijobiy xulosalar berildi, 12 891 ta nom qonunchilik hujjatlari talablariga nomuvofiq deb topilib, qayta ko‘rib chiqish uchun hududiy komissiyalarga qaytarildi.
Bundan tashqari, viloyat, tuman (shahar) xalq deputatlari Kengashlarining tegishli qarorlari bilan tasdiqlanib Geografik obyektlarning nomlari davlat reyestriga kiritish uchun taqdim qilingan 35 560 ta nom ham o‘rganib chiqildi va belgilangan tartibda Davlat reyestri bazasiga kiritildi.
Hozirgi kunda Davlat reyestri bazasida 160 590 ta geografik obyektlarning nomlari jamlangan bo‘lib, shundan:
– 2 808 ta ma’muriy-hududiy birliklar (viloyat, tuman, shahar, shaharcha, qishloq, ovul) nomlari;
– 149 550 ta aholi punktlari va ularning tarkibiy qismlari (mahalla, ko‘cha, maydon, xiyobon, qabriston va ziyoratgoh kabilar) nomlari;
– 2 442 ta transport va muhandislik-texnika infratuzilmasi obyektlari (temir yo‘l stansiyasi, avtostansiya, vokzal, aeroport, ko‘prik, suv ombori, quduq, kanal, foydali qazilma koni, nasos stansiyasi kabilar) nomlari;
– 5 790 ta tabiiy obyektlar (daryo, ko‘l, soy, buloq, tog‘, g‘or, sharshara, cho‘l, vodiy, dara, adir, ariq, hovuz, jarlik, qirlik, qoya, tepalik kabilar) nomlarini tashkil qilmoqda.
